Gall pleidiau gwleidyddol hefyd gofrestru hyd at dri arwyddlun.
Os yw plaid sy’n cyflwyno enwebiad rhestr plaid am i arwyddlun cofrestredig y blaid ymddangos ar y papur pleidleisio wrth enw’r blaid, rhaid gwneud y cais ar y dystysgrif awdurdodi.1
Os oes gan y blaid fwy nag un arwyddlun cofrestredig, dylai unrhyw gais am arwyddlun roi manylion am ba un sydd am ei ddefnyddio. Os nad oes manylion penodol am yr arwyddlun, neu os yw’r blaid gofrestredig yn newid neu’n tynnu’r arwyddlun o’r gofrestr pleidiau gwleidyddol ar ôl i’r papurau enwebu gael eu cyflwyno ond cyn y dyddiad cau ar gyfer enwebiadau, dylech geisio cysylltu â’r Swyddog Enwebu (neu’r person sy’n gweithredu ar ei ran) fel sy’n briodol a gofyn iddo ddewis un. Dylech hefyd ddweud wrtho os nad yw’n dewis arwyddlun penodol cyn y dyddiad cau ar gyfer enwebiadau, ni fyddwch yn gallu argraffu arwyddlun wrth enw’r blaid ar y papur pleidleisio.
Gall y Swyddog Enwebu (neu rywun sydd ag awdurdod i weithredu ar ei ran) ddarparu copi cydran uchel o’r arwyddlun ar gyfer defnydd wrth argraffu papurau pleidleisio, neu gall y blaid ofyn i chi lawrlwytho’r arwyddlun o’n gwefan. Rhaid i chi sicrhau bod pa bynnag gopi a ddefnyddir ar yr un ffurf â’r arwyddlun cofrestredig.
Pennir maint mwyaf arwyddlun ar y papur pleidleisio gan y cyfarwyddiadau argraffu. Wrth ychwanegu arwyddlun plaid at bapur pleidleisio, ni ddylid newid siâp yr arwyddlun. Er enghraifft, peidiwch ag ymestyn arwyddluniau i siapiau sgwâr os nad ydynt wedi’u cofrestru fel delweddau sgwâr ar ein gwefan, gan y byddai hyn yn cael yr effaith o newid eu hedrychiad.
Bydd ffeil Sip o ddelweddau arwyddluniau ar gael ar ein gwefan a gall eich argraffydd ei defnyddio i baratoi papurau pleidleisio. Fodd bynnag, dylid defnyddio'r wybodaeth ar ein cofrestr o bleidiau gwleidyddol i gadarnhau pa arwyddlun i’w argraffu.