Canllawiau i Swyddogion Canlyniadau sy’n gweinyddu etholiad y Senedd

Nid yw ymgeisydd unigol wedi'i enwebu'n ddilys oni bai bod £500 wedi’i roi i chi erbyn y dyddiad cau ar gyfer enwebiadau.1
 
Nid yw plaid wleidyddol gofrestredig nac unrhyw un o’r ymgeiswyr rhestr plaid y mae wedi eu cyflwyno wedi'u henwebu'n ddilys oni bai bod yr ernes wedi’i rhoi ichi erbyn y dyddiad cau ar gyfer enwebiadau.2  Yr ernes ofynnol ar gyfer rhestr plaid yw:

£500 ar gyfer yr ymgeisydd rhestr plaid cyntaf sy'n ymddangos yn gyntaf ar y rhestr.3  

£200 ar gyfer pob un o’r pum ymgeisydd nesaf sy’n ymddangos ar y rhestr plaid.4   

Pan mae person yn gwneud yr ernes ar ran ymgeisydd unigol neu swyddog enwebu cofrestredig plaid, rhaid iddo, ar adeg ei gwneud, roi ei enw a’i gyfeiriad i chi oni bai ei fod wedi’u rhoi yn flaenorol fel rhan o hysbysiad ei benodiad fel asiant etholiad.5  

Gellir gwneud ernesau drwy ddefnyddio:6  

•    tendr cyfreithiol (arian parod punnoedd Prydeinig yn unig)
•    drafft banc y DU

Gallwch wrthod â derbyn drafft banc os nad ydych yn gwybod a yw’r tynnwr yn cynnal busnes fel bancwr yn y Deyrnas Unedig.

Gallwch ddewis derbyn cyllid drwy:7  

•    siec cymdeithas adeiladu, 
•    cerdyn debyd neu gredyd
•    trosglwyddiad electronig o gronfeydd

Dylech hefyd dderbyn taliadau bancwr sy’n orchmynion a gyhoeddir gan fanc, yn addo taliad i’r derbynnydd. Os byddwch yn penderfynu dewis unrhyw un o’r dulliau hyn, dylech eu rhestru ar hysbysiad yr etholiad a nodi yn glir unrhyw ofynion sydd gennych yn y pecyn enwebu.

Os oes ffi ynghlwm â’r dull talu, gallwch drosglwyddo’r ffi hon i’r ymgeisydd. Os felly, dylech nodi hyn yn glir ar hysbysiad yr etholiad a’r pecyn enwebu.