Canllawiau i Swyddogion Canlyniadau sy’n gweinyddu etholiad y Senedd

Rhaid i’r holl ymgeiswyr unigol a rhestr plaid gydsynio’n ffurfiol â’u henwebiad a chyflwyno eu cydsyniad erbyn y dyddiad cau ar gyfer cyflwyno papurau enwebu, sef 4pm, 19 diwrnod gwaith cyn y bleidlais.1

Rhaid i ffurflen cydsynio ag enwebiad ymgeisydd fod ar y ffurf ragnodedig yn naill ai Cymraeg neu Saesneg.2  Gallwch dderbyn cyflwyniadau o’r ffurflen cydsynio ag enwebiad â llaw i un o’r lleoedd a nodir yn yr hysbysiad etholiad neu yn ôl y trefniadau a nodir yn y datganiad cyflwyno electronig.3
 
Rhaid i ffurflen cydsynio ag enwebiad ymgeisydd gynnwys:4

• dyddiad geni’r ymgeisydd
• cyfeiriad yn yr ardal berthnasol5 , a gaiff ei ystyried fel swyddfa’r ymgeisydd os yw’n dod yn asiant arno’i hun os na phenodir neb arall. Yr ardal berthnasol yw’r etholaeth neu etholaeth gyfagos neu mewn sir neu fwrdeistref sirol sydd wedi’i chynnwys yn rhannol neu’n gyfagos i’r etholaeth
• enw ardal awdurdod lleol yng Nghymru y mae’r ymgeisydd wedi’i gofrestru fel etholwr llywodraeth leol
• datganiad hyd eithaf ei wybodaeth a’i gred nad yw wedi ei anghymwyso dan adran 16(A1) o Ddeddf Llywodraeth Cymru 2006 rhag bod yn Aelod o’r Senedd,
• datganiad o aelodaeth plaid 
• yn achos ymgeisydd unigol, datganiad nad yw’n un o’r canlynol ar gyfer etholiad Senedd a gynhelir ar yr un diwrnod: 
  • ymgeisydd rhestr plaid yn yr un etholaeth y Senedd 
  • ymgeisydd unigol mewn unrhyw etholaeth Senedd arall
  • ymgeisydd rhestr plaid mewn unrhyw etholaeth Senedd arall
• yn achos ymgeisydd ar restr plaid gofrestredig, datganiad nad yw’n un o’r canlynol, ar gyfer etholiad Senedd a gynhelir ar yr un diwrnod:
  • ymgeisydd unigol yn yr un etholaeth Senedd 
  • ymgeisydd unigol i unrhyw etholaeth Senedd arall
  • ymgeisydd rhestr plaid mewn unrhyw etholaeth Senedd arall 

Rhaid i’r cydsyniad gael ei lofnodi a’i ddyddio gan yr ymgeisydd a rhaid i’r dyddiad fod ar neu o fewn mis cyn y diwrnod diwethaf ar gyfer cyflwyno papurau enwebu.6

Os nad yw ffurflen cydsyniad ar gyfer ymgeisydd penodol ar restr plaid wedi’i chyflwyno ichi erbyn 4pm, 19 diwrnod gwaith cyn y bleidlais, rhaid i chi dynnu’r unigolyn hwnnw o’r rhestr plaid, ond nid yw enwebiad y rhestr plaid yn cael ei annilysu.7

Llofnod tyst

Rhaid i gydsyniad ymgeisydd ag enwebiad hefyd gael ei ardystio gan dyst.8  Dylai’r tyst fod yn bresennol pan fydd yr ymgeisydd yn llofnodi ei ddatganiad. Nid oes unrhyw gyfyngiadau ar bwy all fod yn dyst.  

Ar gyfer ffurflenni cydsynio a gyflwynir yn electronig, gallai llofnod electronig fod ar ffurf enw wedi’i deipio yn y blwch ar gyfer llofnod er enghraifft.