Dylech nodi'r staff y bydd eu hangen a gwneud y penodiadau angenrheidiol cyn gynted â phosibl.
Dylech sicrhau bod trefniadau dirprwyo ar waith rhag ofn na allwch weithredu'n bersonol. Gallwch benodi dirprwyon i gyflawni eich holl gyfrifoldebau neu unrhyw rai ohonynt.1
Rhaid i bob awdurdod lleol sy'n dod o fewn yr etholaeth sicrhau bod ei swyddogion ar gael i'ch helpu.2
Bydd angen i chi benodi:
clercod deiseb a chynorthwywyr ar gyfer y mannau llofnodi3
staff i anfon ac agor taflenni llofnodi drwy'r post
staff i gyfrif y llofnodion
unrhyw staff cymorth eraill rydych wedi nodi y bydd eu hangen
Rhaid i bob aelod o'r staff gael copi o'r gofynion ynglŷn â chyfrinachedd.4
Er mwyn sicrhau parhad, lle y bo'n bosibl, dylech ystyried cael yr un nifer o staff yn y mannau llofnodi drwy gydol y cyfnod llofnodi.
Lle na ellir cyflawni hyn, gallech ystyried system rota lle bydd yr un aelodau o staff yn gweithio ar yr un diwrnod o'r wythnos drwy gydol y chwe wythnos, er enghraifft.
Rhaid i chi beidio â phenodi unrhyw un sydd wedi cael ei gyflogi gan neu ar ran ymgyrchydd achrededig mewn perthynas â'r ddeiseb.
Bydd angen i chi gynllunio ar gyfer hyfforddi'ch staff er mwyn iddynt fod yn ymwybodol o'u dyletswyddau a'r hyn a ddisgwylir ganddynt. Er bod rôl clerc deiseb yn debyg i rôl Swyddog Llywyddu, bydd angen i chi addasu eich hyfforddiant gorsafoedd pleidleisio i adlewyrchu gwahaniaethau ar gyfer rheoli man llofnodi ar gyfer deiseb adalw – er enghraifft, pwy sy'n gymwys i fynd i fannau llofnodi.
Bydd hefyd angen i chi sicrhau eich bod yn cynnwys hyfforddiant ar gyfer clercod deiseb a chynorthwywyr i'w helpu i ddeall y rhwystrau y gall rhai pobl anabl eu hwynebu wrth fynd i fan llofnodi a sut i ddefnyddio unrhyw gyfarpar a ddarperir er mwyn galluogi pobl anabl i lofnodi'n annibynnol.