Ymgyrchwyr nad ydynt yn bleidiau: Etholiadau cyffredinol Senedd y DU

Argraffu'r canllawiau llawn

Sut i awdurdodi gwariant a dargedir

Os yw plaid wleidyddol yn dymuno eich awdurdodi i fynd i wariant a dargedir hyd at derfyn penodol, rhaid iddo roi awdurdodiad i ni.

Mae awdurdodiad gan blaid wleidyddol gofrestredig:

  • yn gorfod bod mewn ysgrifen
  • yn gorfod cael ei lofnodi gan naill ai trysorydd neu ddirprwy drysorydd y blaid 
  • yn gorfod pennu’r rhannau o’r Deyrnas Unedig lle caniateir i’r gwariant wedi’i dargedu gael ei achosi 
  • yn cael pennu terfyn ar swm y gwariant wedi’i dargedu a awdurdodir.1

Rhaid i’r blaid wleidyddol gofrestredig roi copi o’r awdurdodiad ysgrifenedig i’r Comisiwn. Nid yw’r awdurdodiad yn cael effaith nes bod copi wedi’i roi i’r Comisiwn.2

Gellir gwneud awdurdodiad gan blaid wleidyddol gan ddefnyddio ffurflen TP5.

Ffurflen TP5: Awdurdodi gwariant wedi ei dargedu

 

Dylai'r blaid wleidyddol hefyd roi copi o'r awdurdodiad i chi yn cadarnhau y gallwch fynd i wariant a dargedir.

Os bydd plaid wleidyddol yn rhoi copi i chi o awdurdodiad i fynd i wariant a dargedir, dylech ofyn am gadarnhad ei bod wedi anfon yr awdurdodiad gwreiddiol atom ni. Gallwch gadarnhau hyn drwy edrych ar ein cofrestr o hysbysiadau.

Tynnu awdurdodiad yn ôl

Gall plaid wleidyddol dynnu awdurdodiad yn ôl unrhyw bryd drwy roi hysbysiad ysgrifenedig i ni.

Rhaid i’r penderfyniad i’w dynnu’n ôl:

  • fod mewn ysgrifen
  • cael ei lofnodi gan drysorydd neu ddirprwy drysorydd y blaid.3

Nid yw’r penderfyniad i dynnu awdurdodiad yn ôl yn cael effaith nes bod y blaid wleidyddol gofrestredig wedi rhoi copi i’r Comisiwn.4

Dylai'r blaid wleidyddol hefyd roi copi o'r hysbysiad tynnu awdurdodiad yn ôl i chi yn cadarnhau na chewch fynd i unrhyw wariant pellach a dargedir. Daw'r hysbysiad tynnu awdurdodiad yn ôl i rym ar y dyddiad y bydd yn cyrraedd y Comisiwn Etholiadol.

Os bydd y blaid yn tynnu ei hawdurdodiad yn ôl, ni chewch fynd i unrhyw wariant pellach a dargedir uwchlaw'r terfyn ar gyfer gwariant a dargedir. Dylech wneud yn siŵr bod y blaid wleidyddol yn rhoi gwybod i chi am unrhyw newidiadau i'r awdurdodiad.

Os ydych eisoes wedi gwario mwy na'r terfyn gwariant a dargedir pan dynnir yr awdurdodiad yn ôl, rhaid i chi atal unrhyw wariant pellach a dargedir.

Pan dynnir awdurdodiad yn ôl, ni fydd unrhyw drosedd ôl-weithredol wedi’i chyflawni gan yr ymgyrchydd di-blaid mewn perthynas â gwariant wedi’i dargedu a achoswyd yn unol â’r awdurdodiad a oedd mewn grym ar y pryd.

Diweddarwyd ddiwethaf: 19 Rhagfyr 2023