Egwyddorion ar gyfer prosesau dilysu a chyfrif effeithiol
Dylech sicrhau bod eich trefniadau dilysu a chyfrif yn bodloni'r egwyddorion allweddol canlynol ar gyfer prosesau dilysu a chyfrif effeithiol:
Mae pob proses yn dryloyw, gyda thrywydd archwilio clir a diamwys. Er enghraifft:
caiff popeth ei wneud yng ngolwg pawb sydd â'r hawl i fod yn bresennol
rhoddir digon o wybodaeth i'r rhai sy'n bresennol am y prosesau i'w dilyn
caiff gwybodaeth ei chyfleu mewn modd cywir ac agored.
Mae'r broses ddilysu yn arwain at ganlyniad cywir. Mae hyn yn golygu bod nifer y papurau pleidleisio ym mhob blwch naill ai'n cyfateb i nifer y papurau pleidleisio a ddosbarthwyd a nodwyd ar y cyfrif papurau pleidleisio neu, fel arall:
fod yr hyn sydd wedi achosi'r amrywiant wedi cael ei nodi a gellir ei esbonio, a/neu
bod y blwch wedi cael ei ailgyfrif o leiaf ddwywaith, nes bod yr un nifer o bapurau pleidleisio yn cael eu cyfrif ar ddau achlysur olynol
Mae'r broses gyfrif yn arwain at ganlyniad cywir, lle:
mae cyfanswm nifer y pleidleisiau a fwriwyd dros bob ymgeisydd a chyfanswm nifer y pleidleisiau a wrthodwyd yn cyfateb i gyfanswm nifer y papurau pleidleisio a nodwyd ar y datganiad dilysu ar gyfer yr etholaeth
mae'r prosesau dilysu a chyfrif yn amserol
cedwir cyfrinachedd y bleidlais bob amser
diogelir papurau pleidleisio a deunyddiau ysgrifennu eraill bob amser
caiff gwybodaeth yn ystod y prosesau dilysu a chyfrif ei chyfleu mewn modd clir ac amserol
Yn ogystal ag ystyried sut i sicrhau y bydd eich prosesau'n eich galluogi i fodloni'r egwyddorion allweddol, bydd angen i chi ystyried ffactorau ymarferol perthnasol eraill a fydd yn effeithio ar y ffordd y caiff y prosesau dilysu a chyfrif eu trefnu a'r amser y bydd yn ei gymryd i'w cwblhau, megis:
maint yr etholaeth
daearyddiaeth yr etholaeth
maint a chapasiti'r lleoliad
y gallu i sicrhau tryloywder i ymgeiswyr, asiantiaid a'r rhai sy'n arsylwi yn y lleoliad
cost defnyddio'r lleoliad
Ym mhob achos, dylech gadw cofnod o'ch penderfyniadau ac adolygu eich cynlluniau dilysu a chyfrif yn rheolaidd gan y gall amgylchiadau newid.