Ymgyrchwyr nad ydynt yn bleidiau: Etholiadau cyffredinol Senedd y DU

Gallwch gyflwyno hysbysiad ar-lein gan ddefnyddio CPE Ar-lein. Fel arall, gallwch gwblhau Ffurflen TP1 ac anfon copi wedi'i lofnodi o'r ffurflen atom drwy e-bost neu drwy'r post.

Pan ddaw eich hysbysiad i law, byddwn yn cadarnhau eich bod yn gymwys i gyflwyno hysbysiad, bod yr holl wybodaeth angenrheidiol wedi'i darparu ac yn cadarnhau yn ysgrifenedig pan fydd eich hysbysiad mewn grym. Mewn rhai achosion, efallai y byddwn yn gofyn i chi ddarparu rhagor o wybodaeth cyn y gallwn brosesu eich hysbysiad.

Gan fod yn rhaid i'ch hysbysiad fod mewn grym cyn i chi wario mwy na £10,000 ar weithgarwch ymgyrchu a reoleiddir yn ystod y cyfnod a reoleiddir, ac i ganiatáu amser i'r hysbysiad gael ei brosesu, dylech aros nes i ni gadarnhau bod eich hysbysiad mewn grym cyn gwario dros y swm hwn.
 

Pa wybodaeth y mae angen i chi ei darparu?

Os ydych yn gwneud hysbysiad fel unigolyn, mae'n rhaid i chi roi eich enw a'ch cyfeiriad cartref. 1

Os ydych yn gwneud hysbysiad fel corff a gorfforwyd gan Siarter Frenhinol, sefydliad anghorfforedig elusennol yn y DU neu bartneriaeth Albanaidd sy'n cynnal busnes yn y DU, mae'n rhaid i chi ddarparu:

• enw'r sefydliad a chyfeiriad ei brif swyddfa 2  
• enw'r ‘person cyfrifol’3
•  ‘manylion perthnasol’ y sefydliad 4
• awdurdodiad ysgrifennydd y sefydliad (neu unigolyn sy'n gweithredu mewn rôl debyg) 5  

Ar gyfer sefydliadau eraill sy'n gymwys i wneud hysbysiad, mae'n rhaid i chi ddarparu:

• enw'r sefydliad a chyfeiriad ei brif swyddfa gofrestredig 6
• enw'r ‘person cyfrifol’ 7
• manylion ‘cyfranogwyr perthnasol’ y sefydliad 8
• awdurdodiad ysgrifennydd y sefydliad (neu unigolyn sy'n gweithredu mewn rôl debyg) 9

Person sy’n gweithredu mewn rôl debyg i ysgrifennydd sefydliad fydd â chyfrifoldeb cyffredinol am faterion gweinyddol y sefydliad.

Gweler y tudalennau nesaf am wybodaeth am y person cyfrifol, ei gyfrifoldebau a'r manylion a'r cyfranogwyr perthnasol.

Caiff y manylion hyn, heblaw am gyfeiriad cartref unigolyn, eu cynnwys ar eich cofnod ar y gofrestr o ymgeiswyr nad ydynt yn bleidiau. 

Ni fyddwn yn cyhoeddi unrhyw wybodaeth bersonol, megis cyfeiriadau cartref, cyfeiriadau e-bost na rhifau ffôn a ddarperir yn eich hysbysiad. 

Fel rhan o'ch hysbysiad, gofynnir i chi hefyd ddarparu gwybodaeth neu dystiolaeth eich bod yn bodloni'r gofynion i gael eich ychwanegu at y gofrestr o ymgeiswyr nad ydynt yn bleidiau o dan eich categori dewisol. Er enghraifft, os byddwch yn cyflwyno hysbysiad fel cwmni, gofynnir i chi ddarparu rhif cofrestru eich cwmni a thystiolaeth eich bod yn cynnal busnes yn y DU.

Datganiad mewn perthynas â'r trothwy adrodd

Mae rhwymedigaethau gwahanol o ran gwariant, rhoddion ac adrodd i ymgeiswyr cofrestredig nad ydynt yn bleidiau yn dibynnu ar y datganiad a wneir yn yr hysbysiad.

Fel rhan o'r newidiadau a gyflwynwyd o dan Ddeddf Etholiadau 2022, pan fyddwch yn cyflwyno hysbysiad, gallwch ddatgan eich bod yn bwriadu parhau i fod o dan y trothwyon adrodd ar gyfer etholiadau cyffredinol Senedd y DU. Y trothwyon hyn yw gwario mwy nag £20,000 yn Lloegr neu £10,000 yng Nghymru, yr Alban neu Ogledd Iwerddon.

Os byddwch yn gwneud y datganiad hwn, a bod eich gwariant yn parhau i fod o dan y trothwyon adrodd, mae'n rhaid i chi barhau i gydymffurfio â'r cyfreithiau o ran a ganiateir rhoddion ond byddwch wedi'ch eithrio rhag rhwymedigaethau adrodd.

Gweler Trothwyon adrodd am ragor o wybodaeth.