Canllawiau i Swyddogion Canlyniadau Lleol sy'n gweinyddu Etholiadau ar gyfer Comisiynwyr yr Heddlu a Throseddu

Mae gennych ddyletswydd gyfreithiol i selio'r dogfennau etholiadol a restrir isod ac, ar ôl gorffen cyfrif y papurau pleidleisio, rhaid i chi eu hanfon at y swyddog cofrestru perthnasol.1  

Os nad chi yw'r Swyddog Cofrestru Etholiadol hefyd, bydd angen i'r Swyddog Cofrestru Etholiadol sicrhau bod ganddo ddull o gofnodi dyddiad derbyn y dogfennau, fel ei fod yn gwybod pryd i ddinistrio'r rhai a anfonwyd ymlaen. 

Mae'r rhestr ganlynol yn cynnwys y dogfennau y mae'n rhaid i chi eu hanfon at y Swyddog Cofrestru Etholiadol.
 

Dogfennau o orsafoedd pleidleisio:2  

• Y pecynnau sy'n cynnwys:
  • y rhestr o bleidleisiau a gyflwynwyd 
  • y rhestr o bleidleiswyr ag anableddau a gynorthwywyd gan gymdeithion 
  • y datganiadau a wnaed gan gymdeithion pleidleiswyr ag anableddau 
  • y rhestr o bleidleisiau a farciwyd gan y Swyddog Llywyddu 
  • y datganiadau yn ymwneud â phleidleisiau a farciwyd gan y Swyddog Llywyddu 
  • y rhestr o bobl yr anfonir papurau pleidleisio atynt ar ôl i wall clercaidd gael ei gywiro neu o ganlyniad i benderfyniad ar apêl i'r llys sirol
  • y Rhestr Wrthod Papurau Pleidleisio
  • y Ffurflen Gwerthuso ID Pleidleisiwr a thaflen nodiadau'r Ffurflen Gwerthuso ID Pleidleisiwr (os y'i defnyddiwyd)
• copïau wedi eu marcio o'r gofrestr etholwyr, y rhestr dirprwyon wedi ei marcio ac unrhyw hysbysiadau copi wedi'u marcio o ganlyniad i gywiro gwall clercaidd neu benderfyniad ar apêl i'r llys perthnasol  
• y pecynnau sy'n cynnwys rhestrau rhifau cyfatebol y gorsafoedd pleidleisio wedi'u cwblhau 
• tystysgrifau cyflogaeth y rhai ar ddyletswydd ar y diwrnod pleidleisio

Dogfennau o'r prosesau o ddosbarthu ac agor pleidleisiau post:3  

• copïau wedi'u marcio o'r rhestr pleidleiswyr post a'r rhestr dirprwyon sy'n pleidleisio drwy'r post
• y pecynnau sy'n cynnwys rhestrau rhifau cyfatebol y pleidleisiau post wedi'u cwblhau 
• y pecynnau o ddatganiadau pleidleisio drwy'r post a dderbyniwyd fel rhai dilys 
• y pecynnau o bleidleisiau post a wrthodwyd 
• y pecynnau o amlenni papurau pleidleisio drwy'r post a wrthodwyd
• y rhestrau o bapurau pleidleisio drwy'r post a ganslwyd, a gollwyd ac a ddifethwyd
• y pecyn o bapurau pleidleisio drwy'r post a ddifethwyd a'r dogfennau ategol
• y pecyn o bapurau pleidleisio drwy'r post a gollwyd a oedd yn cynnwys unrhyw ran o'r pecyn pleidleisio drwy'r post nas collwyd ac a ddychwelwyd atoch cyn i chi anfon un arall yn ei le
• y pecyn o bapurau pleidleisio drwy'r post, datganiadau ac amlenni a ganslwyd
• y pecyn o ffurflenni trin pleidleisiau post wedi'u cwblhau ar gyfer pleidleisiau post a wrthodwyd a'r pleidleisiau post a wrthodwyd perthnasol
• y pecyn o ffurflenni trin pleidleisiau post wedi'u cwblhau ar gyfer pleidleisiau post a dderbynnir 
• pecynnau pleidleisio drwy'r post nas agorwyd a dderbyniwyd ar ôl diwedd y cyfnod pleidleisio neu a ddychwelwyd fel rhai nas dosbarthwyd (gellir eu hanfon ar ddyddiad arall yn nes ymlaen)

Rhaid i chi hefyd anfon y rhestr o bleidleisiau post a wrthodwyd oherwydd cawsant eu cyflwyno'n anghywir, y datganiad o ran papurau pleidleisio drwy'r post a'r rhannau perthnasol o'r rhestr o bleidleisiau post sydd wedi methu'r gwiriadau dynodyddion at y Swyddog Cofrestru Etholiadol perthnasol. 

Bydd y Swyddog Cofrestru Etholiadol yn defnyddio'r wybodaeth hon i'w alluogi i anfon hysbysiadau gwrthod dynodyddion pleidlais bost at yr etholwyr hynny. Gallwch ddod o hyd i ragor o wybodaeth am y broses hon yn ein canllawiau i Swyddogion Cofrestru Etholiadol ar gyfer Cymru a Lloegr.

Ar yr un pryd, dylech hefyd anfon eich cofnod o unrhyw achosion lle rydych yn amau bod trosedd wedi'i chyflawni o bosibl, er mwyn i'r Swyddog Cofrestru Etholiadol gael gwybod ym mha achosion na ddylai anfon hysbysiad gwrthod dynodyddion pleidlais bost.

I gael rhagor o wybodaeth am gynnwys y rhestrau amrywiol sy'n ymwneud â phleidleisio drwy'r post, gweler ein canllawiau ar Gadw cofnodion o becynnau pleidleisio drwy'r post a gaiff eu derbyn a'u hagor.  

Dogfennau o'r cyfrif:5

• rhaid storio papurau pleidleisio ar wahân fel:
  • papurau pleidleisio a gyfrifwyd
  • papurau pleidleisio a wrthodwyd
  • papurau pleidleisio nas defnyddiwyd (rhai cyffredin a rhai a gyflwynwyd) a phapurau pleidleisio a ddifethwyd (a osodir gyda'i gilydd)  
  • papurau pleidleisio a gyflwynwyd a gafodd eu defnyddio
• cyfrifon papurau pleidleisio, canlyniad dilysu'r cyfrifon papurau pleidleisio a'r datganiad o bapurau pleidleisio a wrthodwyd