Canllawiau i Swyddogion Canlyniadau Lleol sy'n gweinyddu Etholiadau ar gyfer Comisiynwyr yr Heddlu a Throseddu

Pecynnau ar gyfer papurau pleidleisio drwy’r post a ddosberthir i orsafoedd pleidleisio

Gellir dychwelyd pleidleisiau post â llaw i unrhyw orsaf bleidleisio yn yr ardal bleidleisio.

Ar gyfer pob etholiad a gynhelir, bydd cyfyngiadau ar nifer y pleidleisiau post y gall unigolyn eu cyflwyno, a chyfyngiadau ar bwy y gall yr unigolyn sy’n trin y pleidleisiau post fod. I gael rhagor o wybodaeth, gweler ein canllawiau ar y broses o gyflwyno pleidleisiau post a chyfeiriwch at y llawlyfr i orsafoedd pleidleisio.

Dylech friffio staff gorsafoedd pleidleisio ar y broses cyflwyno pleidleisiau post a hefyd sut i nodi pa bleidleisiau post y gellir eu dychwelyd i'w gorsaf bleidleisio. I gael rhagor o wybodaeth am hyfforddi staff, gweler ein canllawiau ar Hyfforddi Swyddogion Llywyddu, Clercod Pleidleisio ac arolygwyr gorsafoedd pleidleisio.

Dylech ddarparu pecynnau i orsafoedd pleidleisio ar gyfer:

  • derbyn pleidleisiau post
  • dychwelyd ffurflenni wedi'u cwblhau o ddogfennau pleidleisio drwy’r post ar gyfer pleidleisiau post a dderbyniwyd
  • pleidleisiau post a dderbyniwyd ac a wrthodwyd 

Dylai nifer ac arddull y pecynnau fod yn seiliedig ar ffurflenni a ddychwelwyd i orsafoedd pleidleisio yn yr etholiadau cyfatebol diwethaf, ond dylech gadw mewn cof y posibilrwydd o ymgysylltu a diddordeb hwyr yn yr etholiad a allai effeithio ar y nifer sy'n pleidleisio.

Dylid cadw cofnodion o'r holl becynnau o'r fath fel y gellir rhoi cyfrif am bob un. Dylai'r pecynnau gael eu labelu'n glir a nodi:

  • eu bod yn cynnwys pleidleisiau post
  • eu bod yn cynnwys naill ai pleidleisiau post a dderbyniwyd neu a wrthodwyd neu ffurflenni a ddychwelyd o ddogfennau pleidleisio drwy’r post
  • enw'r orsaf bleidleisio
  • dynodwr yr orsaf bleidleisio

Diogelwch pleidleisiau post a ddychwelwyd  

Dylech sicrhau bod modd selio'r pecynnau'n ddiogel. 

Mae gan asiantiaid pleidleisio yr hawl i atodi eu sêl i becynnau wedi'u selio cyn iddynt gael eu symud o'r orsaf bleidleisio, ac felly, rhaid caniatáu iddynt wneud hynny.2   

Fel rhan o'ch hyfforddiant, dylech bwysleisio i Swyddogion Llywyddu pa mor bwysig yw sicrhau diogelwch pleidleisiau post a gaiff eu dychwelyd i orsafoedd pleidleisio. Dylid rhoi'r pleidleisiau post yn y pecynnau a ddarperir yn syth a dylech sicrhau bod y pecynnau'n cael eu storio'n ddiogel drwy gydol y dydd.

Dylech drefnu i bleidleisiau post gael eu casglu o orsafoedd pleidleisio drwy gydol y dydd gan y bydd hyn yn helpu i leihau'r nifer y bydd angen ymdrin â hwy ar ôl diwedd y cyfnod pleidleisio. Gall arolygwyr gorsafoedd pleidleisio gyflawni'r ddyletswydd hon. Dylech sicrhau bod prosesau ar waith i gynnal trywydd archwilio clir a sicrhau diogelwch pecynnau o bleidleisiau post a gasglwyd wrth iddynt gael eu cludo. Rhaid dychwelyd pleidleisiau post a wrthodwyd yn eu pecyn ar ddiwedd y cyfnod pleidleisio.

Diweddarwyd ddiwethaf: 12 Tachwedd 2024