Er nad oes unrhyw arwyddion pendant o dwyll etholiadol posibl, bydd angen i chi gael mecanweithiau ar waith i nodi unrhyw batrymau gweithgarwch a allai awgrymu twyll etholiadol posibl. Dylech fod yn ymwybodol o’r holl ddata sydd ar gael i chi a’u hystyried, gan gynnwys pa un ai a:
fu patrymau anarferol o bapurau pleidleisio a wrthodwyd, gan gynnwys pecynnau pleidleisio drwy'r post a wrthodwyd, mewn etholiadau blaenorol
oes unrhyw batrymau cofrestru neu geisiadau am bleidleisiau absennol anarferol yn y cyfnod sy'n arwain at yr etholiad
Rydych mewn sefyllfa unigryw i adnabod digwyddiadau a phatrymau gweithgarwch a allai fod yn arwydd o dwyll etholiadol yn eich ardal. Gallai cymryd camau cynnar i fynd i’r afael â thwyll posibl helpu i osgoi ymchwiliadau costus gan yr heddlu neu heriau cyfreithiol i ganlyniadau etholiadau.
Dylech sicrhau bod gennych fecanweithiau ar waith i asesu’r risg o dwyll etholiadol yn eich ardal, gan gynnwys ystyried:
a fu hanes o honiadau o dwyll etholiadol yn yr ardal
a oes unrhyw etholiadau penodol sy'n debygol o fod yn agos iawn a lle mae'r brwydro wedi bod yn daer
a oes seddi ymylol a fyddai ond angen newid cymharol fach yn nifer y pleidleisiau i newid rheolaeth
a oes dadlau yn seiliedig ar anghytuno personol cryf yn ogystal â dadleuon gwleidyddol
lle mae lefel uchel o boblogaeth symudol gyda throsiant rheolaidd o etholwyr
lle mae etholwyr a allai fod yn fwy agored i niwed, oherwydd lefelau isel o ran llythrennedd a/neu allu ieithyddol yn y Gymraeg neu'r Saesneg, er enghraifft