Rhaid i ymgeiswyr hefyd gydsynio â'u henwebiad yn ffurfiol, a rhaid iddynt gyflwyno eu cydsyniad erbyn y dyddiad cau ar gyfer cyflwyno papurau enwebu, sef 4pm ar y pedwerydd diwrnod gwaith ar bymtheg cyn yr etholiad. Rhagnodir y ffurflen cydsynio ag enwebiad yn y rheolau etholiadol a rhaid i'r ymgeisydd ddefnyddio'r ffurflen hon neu ffurflen debyg.1
Rhaid ei gyflwyno â llaw ac ni ellir ei bostio, ffacsio, e-bostio na defnyddio unrhyw gyfrwng electronig arall.
Rhaid i'r ffurflen gynnwys y canlynol:
dyddiad geni'r ymgeisydd
datganiad yn nodi ei fod yn ymwybodol o ddarpariaethau Deddf Diwygio'r Heddlu a Chyfrifoldeb Cymdeithasol 2011 ac nad yw, hyd eithaf ei wybodaeth, wedi'i anghymhwyso rhag cael ei ethol yn Gomisiynydd yr Heddlu a Throseddu neu'n Gomisiynydd yr Heddlu, Tân a Throseddu
datganiad yn nodi ei fod yn bodloni'r holl ofynion ar gyfer sefyll
Ni chaiff ymgeiswyr lofnodi eu ffurflenni cydsynio yn gynharach na 31 diwrnod calendr cyn y dyddiad cau ar gyfer cyflwyno eu papurau enwebu.
Rhaid i'r caniatâd hefyd gael ei dystio gan unigolyn arall. Rhaid i'r tyst roi ei enw a'i gyfeiriad ar y ffurflen gydsynio.
Nid oes unrhyw gyfyngiadau o ran pwy all dystio'r ffurflen cydsynio ag enwebiad.