Ymgyrchwyr nad ydynt yn bleidiau: Etholiadau cyffredinol Senedd y DU

Gwariant gan brif ymgyrchwyr a mân ymgyrchwyr

Os ydych yn brif ymgyrchydd, bydd eich gwariant chi ac unrhyw wariant gan eich mân ymgyrchwyr fel rhan o'r ymgyrch ar y cyd yn cyfrif tuag at eich terfyn gwariant chi yn ystod y cyfnod a reoleiddir. Galwn fân ymgyrchwyr sydd wedi cytuno i chi adrodd ar eu rhan yn ‘eich mân ymgyrchwyr’.

Mae'n rhaid i brif ymgyrchwyr fod wedi'u cofrestru, ond ni all mân ymgyrchwyr fod wedi'u cofrestru.

Os ydych yn fân ymgyrchydd, yna nid yw unrhyw wariant ar y brif/mân ymgyrch ar y cyd yn cyfrif tuag at gyfanswm eich gwariant. Mae hyn yn gymwys i'r canlynol: 

• eich gwariant eich hun ar yr ymgyrch ar y cyd
• gwariant y prif ymgyrchydd ar yr ymgyrch ar y cyd
• gwariant unrhyw fân ymgyrchydd arall ar yr ymgyrch ar y cyd

Felly, ar gyfer cyfanswm eich gwariant eich hun, dim ond y canlynol y mae angen i chi ei gyfrif:

• eich gwariant eich hun y tu allan i unrhyw ymgyrch ar y cyd 
• unrhyw wariant gan eich partneriaid mewn ymgyrch gyffredin ar y cyd 

Mae hyn yn golygu y gall mân ymgyrchwyr barhau i fod yn anghofrestredig, hyd yn oed mewn sefyllfaoedd pan fo cyfanswm y gwariant ar yr ymgyrch ar y cyd dros y trothwy hysbysu.

Adroddiadau gan brif ymgyrchwyr a mân ymgyrchwyr

Os mai chi yw'r prif ymgyrchydd, mae'n rhaid i chi adrodd ar y canlynol:

• eich gwariant eich hun ar yr ymgyrch ar y cyd 
• unrhyw wariant ar yr ymgyrch ar y cyd gan eich mân ymgyrchwyr 
• unrhyw wariant arall a reoleiddir yr aethoch iddo ar wahân i'r ymgyrch ar y cyd.

Mae'n rhaid i'ch ffurflen gwariant hefyd gynnwys derbynebau neu anfonebau ar gyfer unrhyw wariant dros £200 yr aed iddo gennych chi a'ch mân ymgyrchwyr.5

Mae hyn yn golygu y dylech ofyn i'ch holl fân ymgyrchwyr:

• roi gwybod i chi faint maent wedi'i wario ar yr ymgyrch ar y cyd ym mhob rhan o'r DU
• rhoi derbynebau ac anfonebau i chi ar gyfer unrhyw wariant dros £200 ar yr ymgyrch ar y cyd

Os ydych yn fân ymgyrchydd, ac rydych yn gwario hyd at £10,000 (y trothwy hysbysu), a'r terfyn etholaethol, ar weithgareddau ymgyrchu a reoleiddir nad ydynt yn gysylltiedig â'r ymgyrch ar y cyd yn ystod y cyfnod a reoleiddir, nid oes rhaid i chi gyflwyno hysbysiad nac adrodd ar unrhyw wariant gennych.

Y prif ymgyrchydd sy'n gyfrifol am adrodd ar eich gwariant ar y cyd i ni. Er mwyn galluogi'r prif ymgyrchydd i adrodd yn llawn ar yr ymgyrchu ar y cyd, dylech:

• gytuno â'r holl ymgyrchwyr eraill nad ydynt yn bleidiau sy'n rhan o'r ymgyrch ar y cyd faint y gallwch ei wario
• dweud wrth eich prif ymgyrchydd faint rydych wedi'i wario ym mhob rhan o'r DU
• dweud wrth eich prif ymgyrchydd faint rydych wedi'i wario ym mhob etholaeth
• darparu derbynebau ac anfonebau ar wariant ar ymgyrchu a reoleiddir sydd dros £200 i'ch prif ymgyrchydd

Enghraifft

Mae Save the Rivers a thri ymgyrchydd arall yn penderfynu cydweithio fel rhan o ymgyrch ar y cyd yng Nghymru. Mae pob un wedi cytuno y bydd pob un yn gwario £9,000 ar yr ymgyrch ar y cyd. Mae Save the Rivers hefyd yn bwriadu gwario £5,000 ychwanegol ar weithgareddau ymgyrchu a reoleiddir nad ydynt yn gysylltiedig â'r ymgyrch ar y cyd. Nid yw'r tri ymgyrchydd arall yn gwario unrhyw arian arall ar weithgareddau ymgyrchu a reoleiddir.

Y trothwy adrodd ar gyfer gwariant yng Nghymru yw £10,000. Gan y bydd cyfanswm y gwariant ar yr ymgyrch ar y cyd yn £36,000 (sydd dros y trothwy adrodd), os caiff yr ymgyrch hon ei rhedeg fel ymgyrch gyffredin ar y cyd yna bydd angen i'r pedwar ymgyrchydd gofrestru ac adrodd ar y gwariant yn unigol.

Gan mai Save the Rivers sy'n bwriadu gwario'r swm mwyaf o arian ar ymgyrchu, ac i leihau'r baich rheoliadol ar y tri ymgyrchydd arall, mae'n penderfynu bod yn brif ymgyrchydd. Cyn yr eir i unrhyw wariant, mae'n cyflwyno hysbysiad heb ddatganiad mewn perthynas â'r trothwy adrodd. Nid yw Save the Rivers yn gwneud y datganiad mewn perthynas â'r trothwy adrodd gyda'i hysbysiad gan fod cyfanswm bwriadedig ei wariant a reoleiddir (£41,000 sy'n cynnwys cyfanswm y gwariant ar yr ymgyrch ar y cyd, sef £36,000, yn ogystal â'i wariant ei hun ar weithgarwch ymgyrchu a reoleiddir, sef £5,000) yn uwch na'r trothwy adrodd.

Mae Save the Rivers hefyd yn hysbysu'r Comisiwn mai ef yw'r prif ymgyrchydd, ac mai mân ymgyrchwyr yn yr ymgyrch ar y cyd yw'r tri ymgyrchydd arall.

Gan fod y tri ymgyrchydd arall wedi cael eu hysbysu fel mân ymgyrchwyr ac, y tu allan i'r ymgyrch ar y cyd nid ydynt wedi mynd dros y trothwy hysbysu (£10,000) na'r terfyn etholaethol, nid oes angen iddynt gyflwyno hysbysiad i ni nac adrodd ar eu gwariant ar yr ymgyrch ar y cyd.

Fel y prif ymgyrchydd, mae'n rhaid i Save the Rivers adrodd ar werth £36,000 o wariant, sef cyfanswm ei wariant a gwariant y tri mân ymgyrchydd ar yr ymgyrch ar y cyd ar ôl yr etholiad. Mae'n rhaid iddo hefyd adrodd ar y £5,000 ychwanegol y mae'n ei wario y tu allan i'r ymgyrch ar y cyd.

Mae'r tri mân ymgyrchydd yn rhoi manylion i Save the Rivers am y gwariant, ynghyd â derbynebau ac anfonebau ar gyfer unrhyw wariant yr aethant iddo dros £200, fel y gall gynnwys y wybodaeth hon yn y ffurflen.