Os ydych yn gweithio gyda nifer o ymgyrchwyr eraill nad ydynt yn bleidiau, mae'n bosibl y byddwch yn penderfynu llunio corff neu sefydliad newydd i gynnal ymgyrch. Gallai'r corff newydd fod yn gwmni, yn elusen neu'n gymdeithas anghorfforedig.
Ar yr amod bod y corff newydd yn gorff ar wahân ac annibynnol ar y sefydliadau a'i creodd, yna caiff y corff ei drin fel sefydliad gwahanol i'r ymgyrchwyr a greodd y corff newydd. Fel sefydliad, mae'n rhaid i'r corff newydd allu gwneud penderfyniadau yn annibynnol. Bydd hyn yn wir hyd yn oed os bydd aelodau'r sefydliadau a greodd y corff newydd yn rhan o'i strwythur rheoli.
Ni fydd gweithgarwch ymgyrchu'r corff newydd yn rhan o gynllun ar y cyd, oni fydd y sefydliad newydd yn gweithio gydag ymgyrchwyr eraill nad ydynt yn bleidiau. Nid yw gwneud rhodd i'r corff newydd yn gyfystyr ag ymgyrchu ar y cyd.
Os bydd y sefydliad newydd yn gwario neu'n bwriadu gwario mwy na £10,000 ar weithgarwch ymgyrchu a reoleiddir yn ystod y cyfnod a reoleiddir, rhaid iddo gyflwyno hysbysiad i ni a dilyn y cyfreithiau ar roddion, gwariant ac adrodd. Gweler Pryd y mae'n rhaid i chi gyflwyno hysbysiad i'r Comisiwn? am ragor o wybodaeth.