Cynllunio eich dull o sicrhau uniondeb yr etholiad
Dylai fod gennych gynlluniau a phrosesau ar waith i sicrhau uniondeb ac diogelwch yr etholiad.
Dylid datblygu eich cynlluniau mewn ymgynghoriad â phwynt cyswllt unigol perthnasol yr heddlu ac ymgynghorydd swyddogol etholedig yr heddlu. Y pwynt cyswllt unigol yw eich cyswllt ar gyfer troseddau sy'n gysylltiedig ag etholiad, gan gynnwys honiadau o dwyll. Mae ymgynghorydd swyddogol etholedig yr heddlu yn gyswllt heddlu penodedig ar gyfer codi pryderon diogelwch a rhannu unrhyw gudd-wybodaeth berthnasol am unrhyw swyddogion etholedig ac ymgeiswyr ar gyfer y rolau hynny. I gael rhagor o wybodaeth, gweler ein canllawiau ar weithio gyda'ch heddlu lleol.
Dylai’r cynlluniau gynnwys:
sut y byddwch yn gweithio gyda'r heddlu lleol, gan gynnwys y pwynt cyswllt unigol ac ymgynghorydd swyddogol etholedig yr heddlu, gan amlinellu sut y caiff cyfrifoldebau eu rhannu er mwyn sicrhau eglurder ynghylch rolau pawb, llinellau cyfathrebu clir a chytundeb o ran pa mor aml y byddech yn disgwyl cysylltu â'ch gilydd
sut y byddwch yn cyfleu eich dull o sicrhau diogewlch ac uniondeb etholiadol i randdeiliaid ac etholwyr, er mwyn cynnal hyder y cyhoedd yn yr etholiad
sut rydych yn bwriadu rhannu manylion cyswllt ymgeiswyr gydag ymgynghorydd swyddogol etholedig yr heddlu i'w galluogi i gysylltu ag ymgeiswyr ac asiantiaid yn uniongyrchol gyda'r canllawiau diogelwch diweddaraf. Dylech adolygu eich polisïau diogelu data a hysbysiadau preifatrwydd i sicrhau bod y rhain yn addas at y diben
systemau ar gyfer monitro dangosyddion ar gyfer twyll etholiadol posibl a phennu trothwyon ar gyfer gweithredu mewn ymateb i hynny
camau penodol i ddelio ag unrhyw achosion posibl o dwyll etholiadol fel:
dull y cytunir arno o sicrhau yr ymchwilir ymhellach i honiadau o dwyll i'r pwynt cyswllt unigol perthnasol ac ymgynghorydd swyddogol etholedig yr heddlu
sefydlu proses ar gyfer trin tystiolaeth, fel y gall yr heddlu wneud unrhyw waith dadansoddi fforensig
Gallai risgiau uniondeb penodol gynnwys y risgiau sy'n gysylltiedig â thai amlfeddiannaeth fel neuaddau preswyl myfyrwyr neu gartrefi gofal lle gall pobl eraill weld post personol neu lle gall y rhai sy'n rhoi gofal helpu preswylwyr mewn cartrefi gofal i gwblhau ceisiadau pleidleisio drwy'r post neu bleidleisiau post.
Gwneud cynlluniau ar gyfer sicrhau diogelwch papurau
Dylai eich cynllun prosiect gynnwys adolygiad o'r trefniadau diogelwch a wnaed â'r heddlu lleol i sicrhau diogelwch papurau pleidleisio drwy gydol y broses.
Dylai eich trefniadau diogelwch atal pobl rhag gweld a defnyddio'r papurau pleidleisio heb awdurdod ar bob cam o'r broses o'u llunio ac wrth eu storio rhwng yr adeg pan gânt eu hargraffu a'r etholiad.
Pa ddull storio bynnag a ddewiswch, dylech sicrhau y gallwch fod yn fodlon eich bod wedi cymryd pob cam angenrheidiol i sicrhau bod y papurau pleidleisio ac eitemau eraill yn cael eu cadw'n ddiogel drwy'r amser ac na ellir ymyrryd â hwy.