Canllawiau i Swyddogion Canlyniadau sy’n gweinyddu etholiad y Senedd

Arsylwyr achrededig

Mae arsylwi etholiadol yn rhan werthfawr a chyfreithlon o’r broses etholiadol, a dylid cymryd gofal i beidio â rhwystro na tharfu ar unrhyw arsylwyr.  

Er bod gennych yr hawl i ofyn i arsylwr adael am gamymddwyn, a/neu gyfyngu nifer yr arsylwyr a all fod yn bresennol ar unrhyw adeg yn ystod y dilysu a chyfrif, dylech fod yn ofalus wrth wneud hynny.1  

Nid oes gennych yr hawl i wahardd pob arsylwr o'r dilysu a chyfrif; dim ond cyfyngu ar y nifer o arsylwyr sy’n bresennol ar unrhyw adeg, a dylech gymhwyso’r disgresiwn hwn yn rhesymol. 

Os byddwch yn atal mynediad, neu'n tynnu arsylwr achrededig o’r dilysu neu gyfrif, dylech sicrhau bod llwybr archwilio i gefnogi eich penderfyniad. Mae templed o gofnod cyfyngiadau mynediad arsylwyr ar gael at y diben hwn.

Gallwch ddod o hyd i'r templed log cyfyngiadau mynediad arsylwr yn yr adran gwirio a chyfrif ar ein tudalen adnoddau. 

Wrth reoli presenoldeb arsylwyr, rhaid i chi ystyried Cod ymarfer i arsylwyr y Comisiwn.2 Os cewch unrhyw broblemau gydag arsylwyr sy'n mynd i’r broses gyfrif, cysylltwch â thîm y Comisiwn yng Nghymru cyn gynted â phosibl. 

Cynrychiolwyr y Comisiwn

Mae gan gynrychiolwyr y Comisiwn yr hawl i fod yn bresennol yn y broses ddilysu a chyfrif ac i arsylwi eich arferion gweithio. 

Gallant ofyn cwestiynau i’ch staff, ond ni fyddant yn gwneud hynny os byddai hyn yn rhwystro neu’n tarfu ar gynnal y broses. 

Nid oes gennych yr hawl i gyfyngu ar y nifer o gynrychiolwyr y Comisiwn yn y dilysu a chyfrif.3   

Ceir rhagor o wybodaeth yn ein canllawiau ar benodi arsylwyr achrededig a chynrychiolwyr y Comisiwn.