Canllawiau i Ymgeiswyr ac Asiantau yn etholiadau cyffredinol Senedd y DU ym Mhrydain Fawr

Dim ond o ffynhonnell a ganiateir y gallwch chi dderbyn rhoddion dros £50.1  Gallwch ddod o hyd i ragor o wybodaeth am ffynonellau a ganiateir a sut i wirio a yw gwahanol fathau o roddwyr yn rhai a ganiateir yn Gan bwy y gallwch chi dderbyn rhodd? 

Nid yw arian a roddir trwy dudalen we cyllido torfol sy’n £50 neu lai yn rhodd yn ôl cyfraith etholiadol ac nid yw’n adroddadwy.2

Rhaid i chi beidio â derbyn rhodd sy’n werth dros £50 os na allwch nodi pwy yw’r rhoddwr gwirioneddol, neu os yw’r rhodd yn ddienw.3  Rhodd ddienw yw pan na ddarperir unrhyw wybodaeth am y rhoddwr i'r person neu'r sefydliad sydd wedi derbyn y rhodd.

Wrth dderbyn rhoddion, rhaid i chi fod yn ymwybodol o sefyllfaoedd lle mae’n ymddangos bod rhoddwr yn ceisio osgoi’r gyfraith ar yr hyn a ganiateir, er enghraifft, os bydd rhywun yn gwneud rhoddion lluosog o £50 neu lai. Mae'n drosedd ceisio osgoi'r rheolaethau ar roddion.4  Os ydych yn pryderu y gallai hyn fod yn digwydd, cysylltwch â ni am gyngor. 

Gwirio’r hyn a ganiateir

Unwaith y derbynnir rhodd, mae gennych 30 diwrnod i gynnal gwiriadau caniatâd a phenderfynu a ddylid ei derbyn neu ei dychwelyd.5  Y dyddiad derbyn yw'r dyddiad yr ydych yn derbyn yr arian o’r wefan cyllido torfol. Gall hyn fod yn wahanol i’r dyddiad y gwnaed y rhodd. Bydd pryd yr ydych yn derbyn yr arian yn dibynnu a yw'r platfform cyllido torfol yn caniatáu i chi godi arian yn ystod eich ymgyrch, neu unwaith y bydd wedi dod i ben. 

Rhaid i chi gydymffurfio â chyfreithiau ar roddion ar gyfer unrhyw rodd a gewch yn ystod y cyfnod a reoleiddir. Mae hyn yn cynnwys rhoddion a wnaed ar eich tudalen cyllido torfol cyn i'r cyfnod a reoleiddir ddechrau ond a drosglwyddwyd i chi yn ystod y cyfnod a reoleiddir.

Dylech gofnodi gwybodaeth ar gyfer yr holl roddion y byddwch yn eu gwirio, gan y bydd angen i chi adrodd y manylion hyn yn eich ffurflen.

Gwirio rhoddion preifat

Rhodd cyllido torfol preifat yw pan nad yw manylion y rhoddwr i’w gweld ar dudalen cyllido torfol gyhoeddus, ond mae’r wybodaeth hon yn cael ei darparu i’r person a greodd y dudalen. 

Gallwch dderbyn rhoddion cyllido torfol preifat, ar yr amod bod gennych y manylion sydd eu hangen i wirio a ganiateir y rhoddwr.

Pan fyddwch yn derbyn rhodd cyllido torfol preifat dros £50, dylech wneud yn siŵr bod gennych ddigon o wybodaeth am y rhoddwr i gynnal gwiriadau caniatâd. 

Er enghraifft, os byddwch yn derbyn rhodd o £100 gan unigolyn sydd ond wedi darparu enw a chyfeiriad e-bost, dylech gysylltu â’r rhoddwr i ofyn am ei gyfeiriad cartref. Bydd angen y wybodaeth hon arnoch i wirio a yw'r unigolyn ar gofrestr etholiadol y DU, ac felly, yn rhoddwr a ganiateir.

Os na allwch wirio bod y rhoddwr yn un a ganiateir o'r wybodaeth sydd gennych, rhaid i chi ddychwelyd y rhodd.

Dychwelyd rhoddion nas caniateir

Os na allwch nodi pwy yw'r rhoddwr, neu os yw'r rhoddwr yn un nas caniateir, yna rhaid i chi ddychwelyd y rhodd o fewn 30 diwrnod i'w derbyn.6  Efallai y bydd y platfform cyllido torfol rydych chi'n ei ddefnyddio yn caniatáu i chi ddychwelyd y rhodd yn uniongyrchol i'r rhoddwr. 

Os na allwch ddychwelyd y rhodd i’r rhoddwr, dylech ei dychwelyd i’r sefydliad ariannol a ddefnyddiwyd i drosglwyddo’r rhodd. Gallai hwn fod y platfform cyllido torfol rydych yn ei ddefnyddio, neu’r banc sydd wedi trosglwyddo’r rhodd ar ran y platfform.

Os nad yw'n bosibl dychwelyd y rhodd i'r rhoddwr neu'r sefydliad ariannol, cysylltwch â ni gan fod yn rhaid i chi anfon y rhodd i'r Comisiwn Etholiadol. Byddwn yn talu’r rhodd i’r Gronfa Gyfunol a reolir gan Drysorlys EF.7  Cysylltwch â ni i drefnu i'r arian hwn gael ei drosglwyddo.