Ymgyrchwyr nad ydynt yn bleidiau: Etholiadau cyffredinol Senedd y DU

Os ydych yn ymgyrchu yn y cyfnod cyn etholiad cyffredinol Senedd y DU, rhaid i chi gyflwyno adroddiad wythnosol ar roddion a gewch sydd dros swm penodol rhwng diddymu'r Senedd a'r diwrnod pleidleisio. ‘Adroddiadau wythnosol cyn y bleidlais’ yw'r enw ar y rhain.

Pa ymgyrchwyr nad ydynt yn bleidiau sydd angen cyflwyno adroddiadau wythnosol cyn y bleidlais?

Mae'n ofynnol i ymgyrchwyr cofrestredig nad ydynt yn bleidiau, oni bai eu bod wedi datgan y byddant yn gwario llai na'r trothwyon adrodd, gyflwyno adroddiadau wythnosol cyn y bleidlais.4  Gyda'r datganiad hwn, byddwch wedi'ch eithrio o hyd os bydd eich gwariant yn parhau i fod o dan y trothwy adrodd.5

Os na fyddwch yn cael unrhyw roddion adroddadwy yn ystod cyfnod adrodd, nid oes angen i chi gyflwyno adroddiad ar gyfer yr wythnos honno.6

Pa roddion y mae'n rhaid i chi adrodd arnynt?

Ym mhob adroddiad wythnosol, mae'n rhaid i chi adrodd ar fanylion pob rhodd sy'n werth mwy na £7,500 a gafodd eich sefydliad yn ystod y cyfnod adrodd wythnosol a gafwyd at ddiben talu am wariant ar weithgarwch ymgyrchu a reoleiddir.7

Nid yw hyn yn cynnwys rhoddion a gydgrynhowyd.

Rhaid i chi roi gwybod am bob rhodd sydd dros y gwerth hwn rydych wedi'i chael hyd yn oed os nad ydych wedi'i derbyn eto – er enghraifft, gallwch gael rhodd ond ei gwrthod yn ddiweddarach os nad yw'n dod o ffynhonnell a ganiateir.

Os nad ydych yn derbyn unrhyw roddion adroddadwy yn ystod cyfnod adrodd, nid oes angen i chi gyflwyno adroddiad ar gyfer y chwarter hwnnw gan nad oes angen ffurflenni 'dim'.8

Pa fanylion y mae'n rhaid i chi adrodd arnynt?

Rhaid i chi adrodd ar y canlynol ar gyfer rhoddion yr ydych wedi’u derbyn sy’n bodloni’r trothwyon uchod:

• y manylion gofynnol ar gyfer y math o roddwr9  (gweler Gan bwy y gallwch dderbyn rhoddion? i gael canllawiau ar y manylion y mae'n rhaid i chi eu cofnodi ar gyfer pob math o roddwr)
• swm y rhodd, os yw'n rhodd ariannol, neu natur a gwerth y rhodd os yw'n rhodd anariannol10   
• y dyddiad y cawsoch y rhodd11   

Beth yw'r terfynau amser ar gyfer cyflwyno adroddiadau wythnosol cyn y bleidlais?

Rhaid cyflwyno pob adroddiad wythnosol cyn y bleidlais i'r Comisiwn Etholiadol o fewn saith diwrnod i ddiwedd pob cyfnod adrodd.12

Gallwch gyflwyno eich adroddiadau ar CPE Ar-lein. Fel arall, gallwch lawrlwytho'r ffurflenni adrodd isod ac anfon y ffurflenni wedi'u cwblhau atom drwy e-bost i [email protected] neu gallwch eu hanfon atom drwy'r post.