Ymgyrchwyr nad ydynt yn bleidiau: Etholiadau cyffredinol Senedd y DU

Yn unol â'r gyfraith, mae'n rhaid i rai ymgyrchwyr nad ydynt yn bleidiau adrodd ar rai rhoddion y maent wedi'u derbyn neu eu dychwelyd yn chwarterol (bob tri mis) yn ystod y cyfnod cyn diddymu. ‘Adroddiadau chwarterol cyn y bleidlais’ yw'r enw ar y rhain.

Pa ymgyrchwyr nad ydynt yn bleidiau sydd angen cyflwyno adroddiadau chwarterol cyn y bleidlais?

Mae'n ofynnol i ymgyrchwyr cofrestredig nad ydynt yn bleidiau, oni bai eu bod wedi datgan y byddant yn gwario llai na'r trothwyon adrodd, gyflwyno adroddiadau chwarterol cyn y bleidlais.3  Gyda'r datganiad hwn, byddwch wedi'ch eithrio o hyd os bydd eich gwariant yn parhau i fod o dan y trothwy adrodd.4

Os na fyddwch yn cael unrhyw roddion adroddadwy yn ystod cyfnod adrodd, nid oes angen i chi gyflwyno adroddiad ar gyfer y chwarter hwnnw.5

Pryd mae'r cyfnod cyn diddymu?

Diddymu yw'r term swyddogol ar gyfer diwedd Senedd y DU. Pan gaiff Senedd y DU ei diddymu, daw pob sedd yn Nhŷ'r Cyffredin yn wag tan ar ôl yr etholiad cyffredinol.

Mae'r cyfnod cyn diddymu yn dechrau pan fydd tymor Senedd y DU yn mynd i mewn i'w bedwaredd flwyddyn ac yn gorffen y diwrnod cyn i'r Senedd gael ei diddymu.6  Bydd tymor y Senedd bresennol yn mynd i mewn i'w bedwaredd flwyddyn ar 17 Rhagfyr 2023.

Mae hyd y cyfnod cyn diddymu yn dibynnu ar y dyddiad y trefnir i ddiddymu'r Senedd. Yn unol â Deddf Diddymu a Galw'r Senedd 2022, os na chaiff ei diddymu'n gynharach, caiff Senedd y DU ei diddymu'n awtomatig pan fydd tymor y Senedd yn mynd i mewn i'w bumed blwyddyn.7  Gall y cyfnod cyn diddymu hwn bara hyd at flwyddyn felly.

Os caiff y Senedd ei diddymu cyn i dymor y Senedd fynd i mewn i'w bedwaredd flwyddyn, ni fydd cyfnod cyn diddymu na gofynion adrodd chwarterol ar gyfer yr etholiad hwnnw.

Pa roddion y mae'n rhaid i chi adrodd arnynt?

Y rhoddion sy'n adroddadwy ym mhob adroddiad chwarterol:

• pob rhodd gan roddwyr nas caniateir neu anhysbys yr ymdriniwyd â hi yn ystod y cyfnod adrodd8  
• lle na dderbyniwyd unrhyw roddion gan y rhoddwr a oedd yn adroddadwy mewn adroddiad chwarterol blaenorol:9
  • pob rhodd a dderbyniwyd a oedd yn werth mwy na £7,500 yn ystod y cyfnod adrodd10
  • pob rhodd a dderbyniwyd gan yr un rhoddwr yn ystod y cyfnod cyn diddymu sy'n creu cyfanswm o fwy na £7,500 (rhoddion a gydgrynhowyd)11
• lle mae'r rhoddwr wedi gwneud rhodd a oedd yn adroddadwy mewn adroddiad chwarterol blaenorol:12
  • pob rhodd a dderbyniwyd a oedd yn werth mwy na £1,500 yn ystod y cyfnod adrodd13
  • pob rhodd a dderbyniwyd gan yr un rhoddwr o fewn y cyfnod cyn diddymu sy'n creu cyfanswm o fwy na £1,500 ac nad oedd yn adroddadwy mewn adroddiad chwarterol cynharach (rhoddion a gydgrynhowyd)14

a gafwyd at ddiben talu am wariant ar weithgarwch ymgyrchu a reoleiddir.

Os nad ydych yn derbyn unrhyw roddion adroddadwy yn ystod cyfnod adrodd, nid oes angen i chi gyflwyno adroddiad ar gyfer y chwarter hwnnw gan nad oes angen ffurflenni 'dim'.15  

Os oes angen i chi gyflwyno adroddiad, mae'n rhaid i chi hefyd adrodd ar gyfanswm gwerth pob rhodd arall a dderbyniwyd gennych yn ystod y cyfnod cyn diddymu sy'n werth rhwng £500 a dros y trothwyon.16  Nid oes angen i chi roi rhagor o wybodaeth am y rhoddion hyn.  

Pa fanylion y mae'n rhaid i chi adrodd arnynt?

Ar gyfer rhoddion rydych wedi'u derbyn sy'n bodloni'r trothwyon uchod, mae'n rhaid i chi adrodd ar:

• y manylion gofynnol ar gyfer y math perthnasol o roddwr16  (gweler Gan bwy y gallwch dderbyn rhoddion? i gael canllawiau ar y manylion y mae'n rhaid i chi eu cofnodi ar gyfer pob math o roddwr)
• swm y rhodd, os yw'n rhodd ariannol, neu natur a gwerth y rhodd os yw'n rhodd anariannol17
• y dyddiad y cawsoch y rhodd
• y dyddiad y gwnaethoch dderbyn y rhodd18

Ar gyfer rhoddion gan roddwyr nas caniateir neu roddwyr anhysbys, mae'n rhaid i chi gofnodi:

• enw'r ffynhonnell, os yw'n hysbys, neu'r modd y gwnaed y rhodd19
• swm y rhodd, os yw'n rhodd ariannol, neu natur a gwerth y rhodd os yw'n rhodd anariannol20
• y dyddiad y cawsoch y rhodd21
• y dyddiad y dychwelwyd y rhodd gennych22
• y camau a gymerwyd gennych i ddychwelyd y rhodd (er enghraifft, yr unigolyn neu'r sefydliad y dychwelwyd y rhodd iddo)23

Beth yw'r terfynau amser ar gyfer cyflwyno adroddiadau chwarterol cyn y bleidlais?

Rhaid cyflwyno pob adroddiad chwarterol cyn y bleidlais i'r Comisiwn Etholiadol o fewn 30 diwrnod i ddiwedd pob cyfnod adrodd.24

Mae'r tabl isod yn nodi'r cyfnodau adrodd a'r dyddiadau cau ar gyfer cyflwyno adroddiadau i ni.

Gallwch gyflwyno eich adroddiadau ar CPE Ar-lein. Fel arall, gallwch lawrlwytho'r ffurflenni adrodd isod ac anfon y ffurflenni wedi'u cwblhau atom drwy e-bost i [email protected] neu gallwch eu hanfon atom drwy'r post.