Canllawiau i Swyddogion Canlyniadau sy’n gweinyddu etholiad y Senedd

Fel rhan o’ch cynlluniau ar gyfer ymgysylltu â phleidiau gwleidyddol, ymgeiswyr unigol ac asiantiaid a’u cefnogi wrth iddynt gymryd rhan yn yr etholiadau, bydd angen i chi benderfynu sut fydd gwybodaeth ynghylch trefniadau lleol yn cael ei darparu iddynt. 

Bydd trefniadau lleol yn cynnwys gwybodaeth ynghylch dyddiadau, amseroedd a lleoliadau’r prif brosesau etholiadol, gan gynnwys:

• anfon ac agor pleidleisiau post
• y diwrnod pleidleisio
• cyfarpar a ddarperir i orsafoedd pleidleisio sy'n ei gwneud yn haws i bobl anabl bleidleisio
• y broses ddilysu a'r cyfrif

Dylai eich sesiwn/sesiynau briffio hefyd dynnu sylw at unrhyw drefniadau diogelwch yr ydych wedi'u rhoi ar waith mewn ymgynghoriad â'r heddlu, gan gynnwys eich cynlluniau i rannu manylion cyswllt e-bost/rhif ffôn yr ymgeisydd gydag Ymgynghorydd Swyddogol Etholedig yr Heddlu lleol i helpu i gynnal diogelwch ymgeiswyr. Dylech gynghori ymgeiswyr sut y bydd eu manylion cyswllt yn cael eu defnyddio a rhoi cyfle iddynt optio allan os oes angen. 

Dylech hefyd wahodd Pwynt Cyswllt Unigol ac Ymgynghorydd Swyddogol Etholedig yr heddlu i fynychu unrhyw sesiynau briffio, neu i ddarparu deunydd ysgrifenedig y gallwch ei ddarparu i ymgeiswyr ac asiantiaid.

Mae canllawiau diogelwch ychwanegol ar gyfer ymgeiswyr ac asiantiaid ar gael yn Canllawiau diogelwch ar gyfer etholiadau - GOV.UK.

Dylech hefyd drafod y safonau ymddygiad yr ydych yn eu disgwyl gan gefnogwyr yn ardal y man bleidleisio ar y diwrnod pleidleisio ac yn ystod y broses ddilysu a'r cyfrif.

Mae Ymarfer Proffesiynol Awdurdodedig y Coleg Plismona wedi cynhyrchu canllawiau ar Gynnal trefn ac atal dylanwad amhriodol y tu allan i orsafoedd pleidleisio. Mae’r ddogfen hon wedi’i chynllunio i helpu’r heddlu i feddwl am y ffordd orau o fynd i’r afael â phlismona gorsafoedd pleidleisio ac mae’n cynnig rhai camau ymarferol i’w helpu i leihau’r tebygolrwydd y bydd problemau’n codi ac i ymdrin ag unrhyw rai a all godi. Er ei fod wedi’i fwriadu ar gyfer y pwynt cyswllt unigol, gall fod o ddefnydd i chi hefyd, yn enwedig wrth gyfleu i ymgeiswyr ac asiantiaid y safonau ymddygiad a ddisgwylir gan gefnogwyr yn ardal y man bleidleisio. Dylid ei darllen ar y cyd ag adran ymgyrchu y tu allan i orsafoedd pleidleisio y Cod Ymddygiad ar gyfer ymgyrchwyr yn etholiadau Senedd Cymru, mewn etholiadau lleol yng Nghymru, yn etholiadau Senedd yr Alban ac mewn cynghorau yn yr Alban.