Canllawiau i Swyddogion Canlyniadau sy’n gweinyddu etholiad y Senedd

| Argraffu'r canllawiau llawn

Darparu gwybodaeth ynghylch cael mynediad at y gofrestr etholiadol

Mae gan ymgeiswyr unigol yr hawl am gopi am ddim o'r gofrestr lawn ar gyfer yr etholaeth maen nhw'n sefyll ynddi ar gais ysgrifenedig pan ddônt yn ymgeisydd yn swyddogol. Y dyddiad cynharaf y gall rhywun ddod yn ymgeisydd swyddogol yw ar ddyddiad diddymu'r Senedd. Bydd unigolyn yn dod yn ymgeisydd yn swyddogol ar y diwrnod hwn neu cyn y diwrnod hwn os ydy ef/hi neu eraill eisoes wedi datgan ei f/bod yn ymgeisydd.1

Yn achos plaid sy'n cyflwyno rhestr o ymgeiswyr, mae gan yr asiant etholiadol ar gyfer y rhestr plaid yr hawl am gopi o'r gofrestr lawn.

Er mai'r Swyddog Cofrestru Etholiadol ar gyfer pob ardal awdurdod lleol sydd â'r cyfrifoldeb cyfreithiol am gyflenwi cofrestrau, yn achos etholaeth sy'n croesi ffiniau awdurdodau lleol, dylech gael cynlluniau ar waith ar gyfer rheoli neu gydlynu ceisiadau a chyflenwi copïau o'r cofrestrau i ymgeiswyr i sicrhau y gellir cyflenwi pob ymgeisydd â'r cofrestrau mewn modd sy'n golygu bod ganddynt fynediad prydlon a rhwydd iddynt.

Er enghraifft, efallai y byddwch chi'n ystyried cyflenwi'r cofrestrau yn ganolog ar ran yr holl Swyddogion Cofrestru Etholiadol yn yr etholaeth a chynnwys ffurflen gais yn y pecyn enwebu sy'n cwmpasu pob ardal awdurdod lleol sy'n rhan o'r etholaeth. Mantais y dull hwn yw mai dim ond un ffurflen gais yn cwmpasu ardaloedd yr holl awdurdodau lleol sydd ei hangen a gellir caffael cofrestrau o un lle, yn hytrach na gorfod cysylltu â Swyddogion Cofrestru Etholiadol ar wahân gyda cheisiadau unigol.

Os ydych chi'n ystyried cyflenwi'r cofrestrau yn ganolog, bydd angen i chi drafod a chytuno gyda'r Swyddogion Cofrestru Etholiadol sut ellid dwyn ynghyd yr amrywiol gofrestrau a diweddariadau iddynt ar gyfer eu cyflenwi'n amserol wedi hynny, yn cynnwys sut fyddai hyn yn gweithio ar gyfer copïau argraffedig a chopïau data. Rhaid cyflenwi'r cofrestrau ar ffurf data oni bai bod rhywun wedi gofyn yn benodol am gopi argraffedig.2

Rydym wedi cynhyrchu templed o gofrestr etholiadol a rhestr o bleidleiswyr absennol y gellir eu darparu i ymgeiswyr ac asiantiaid etholiadol. 

Gallwch ddod o hyd i'r ffurflen gais ar gyfer cofrestru a'r ffurflen gais ar gyfer pleidleiswyr absennol yn adran gynllunio ein tudalen adnoddau.

Am ragor o wybodaeth ynghylch mynediad a chyflenwi'r gofrestr etholiadol lawn a'r rhestrau pleidleiswyr absennol i ymgeiswyr, pleidiau gwleidyddol (a all wneud cais am gopi ar unrhyw bryd) ac eraill, gweler ein canllawiau ar gyfer Swyddogion Cofrestru Etholiadol ynghylch cael mynediad at y gofrestr etholiadol a’i chyflenwi.  

Diweddarwyd ddiwethaf: 18 Tachwedd 2025