Ymgyrchwyr nad ydynt yn bleidiau: Etholiadau Senedd Cymru

| Argraffu'r canllawiau llawn

Canfasio ac ymchwil y farchnad

Dim ond os yw’n ceisio barn neu wybodaeth gan y cyhoedd yn gyffredinol y bydd canfasio ac ymchwil marchnad sy’n bodloni’r prawf diben ac sy’n digwydd yn ystod cyfnod a reoleiddir yn weithgarwch ymgyrchu a reoleiddir.

Gall canfasio ac ymchwil marchnad gynnwys gweithgareddau fel: 

  • curo ar ddrysau neu ffyrdd eraill o gasglu gwybodaeth gan aelodau o’r cyhoedd
  • defnyddio banciau ffôn i ffonio aelodau o’r cyhoedd i hyrwyddo plaid benodol neu gategorïau o ymgeiswyr, neu i ddarganfod sut mae unigolyn yn bwriadu pleidleisio
  • arolygon neu holiaduron a anfonir at aelodau o’r cyhoedd i ddarganfod sut mae unigolyn yn bwriadu pleidleisio

Os yw eich gweithgarwch canfasio neu ymchwil marchnad yn bodloni’r prawf diben ond dim ond gydag aelodau neu gefnogwyr eich sefydliad y caiff ei gynnal, ni fydd yn weithgarwch ymgyrchu a reoleiddir gan nad yw’n cynnwys y cyhoedd yn gyffredinol.1

Dyma enghreifftiau o gostau a fydd yn cael eu cynnwys mewn cysylltiad â chanfasio ac ymchwil marchnad.

Gwasanaethau, safleoedd, cyfleusterau neu gyfarpar 

Mae enghreifftiau’n cynnwys costau:

  • gwasanaethau a ddarperir gan asiantaeth, unigolyn neu sefydliad
  • safle neu gyfleusterau
  • offer

a ddefnyddir mewn cysylltiad â chanfasio neu ymchwil marchnad. Mae hyn yn cynnwys cofnodi, dadansoddi neu wneud defnydd o ganlyniadau unrhyw ymchwil marchnad neu weithgarwch canfasio.

Er enghraifft, rydych chi’n llogi asiantaeth ymchwil marchnad i gael cipolwg ar fwriad pleidleisio aelodau’r cyhoedd ledled Cymru ac yn dadansoddi’r data hwn ar eich rhan. Nod yr ymchwil marchnad yw ei ddefnyddio i dargedu eich ymgyrch at bleidleiswyr yn etholiad y Senedd.

Gan ddefnyddio’r data hwn, rydych chi wedyn yn llogi banciau ffôn i gysylltu â phleidleiswyr yn yr wythnosau cyn etholiad, gyda’r bwriad o ddylanwadu arnyn nhw i bleidleisio dros bleidiau sy’n cefnogi polisi penodol. 

Gan fod yr ymchwil marchnad a bancio dros y ffôn yn bodloni’r prawf diben ac yn ceisio barn aelodau o’r cyhoedd, mae’r costau hyn yn weithgareddau ymgyrchu a reoleiddir.

Costau casglu neu gynnal data 

Mae enghreifftiau’n cynnwys cost cyrchu, prynu, datblygu a chynnal:

  • meddalwedd TG neu gronfeydd data o fanylion cyswllt
  • setiau data, gan gynnwys defnydd o ddadansoddeg data i hwyluso neu i gynnal ymchwil y farchnad neu ganfasio

Er enghraifft, costau gan gynnwys gwrando ar gyfryngau cymdeithasol a defnyddio’r data i ddeall bwriad pleidleiswyr.

Costau eraill

Mae enghreifftiau’n cynnwys cost prynu a defnyddio unrhyw offer sydd ei angen i:

  • paratoi, llunio neu hwyluso gwaith canfasio neu ymchwil y farchnad 
  • cynnal neu gydlynu gwaith canfasio neu ymchwil y farchnad
  • cofnodi neu ddadansoddi, neu ddefnyddio mewn ffordd arall, ganlyniadau unrhyw weithgarwch ymchwil y farchnad neu ganfasio

Er enghraifft, gliniaduron neu lechi os cânt eu defnyddio ar gyfer canfasio a ffonau symudol os cânt eu defnyddio gan arweinydd/cydlynydd y gwaith canfasio os bydd yr offer hwnnw a/neu gostau cysylltiedig yn cael eu talu neu eu had-dalu gan drydydd parti cofrestredig.

Diweddarwyd ddiwethaf: 19 Awst 2025