Trafnidiaeth mewn cysylltiad â rhoi cyhoeddusrwydd i’ch ymgyrch
Ystyrir bod costau trafnidiaeth yn weithgaredd ymgyrchu a reoleiddir os byddwch yn cludo pobl er mwyn rhoi cyhoeddusrwydd i ymgyrch sy’n bodloni’r prawf diben. Er enghraifft, efallai bod gennych fws ymgyrchu rydych chi’n ei ddefnyddio fel rhan o’ch ymgyrch.
Weithiau gall gwariant ar drafnidiaeth ddod o fewn categori arall o weithgarwch ymgyrchu a reoleiddir. Er enghraifft, os ydych chi’n llogi fan ac yn gosod hysbysebion ar y fan, gallai hyn fod yn ddeunydd etholiadol, neu os ydych chi’n llogi minibws i fynd â’ch cefnogwyr i rali gyhoeddus, efallai y bydd angen cyfrif y costau trafnidiaeth fel rhan o gostau cynnal y rali gyhoeddus.
Nid yw gweithgarwch ymgyrchu a reoleiddir yn cynnwys treuliau personol rhesymol a ysgwyddir gan unigolyn wrth deithio neu wrth ddarparu ar gyfer anghenion personol yr unigolyn.
Mae enghreifftiau’n cynnwys costau trafnidiaeth:
gwirfoddolwyr
aelodau, gan gynnwys aelodau o staff
pobl eraill sy’n ymgyrchu ar ran yr ymgyrchydd nad yw’n blaid
i, o neu o amgylch ardal etholiadol pan fyddant yn ymgyrchu ar ran yr ymgyrchydd nad yw’n blaid. Gall y costau trafnidiaeth hyn gynnwys:
prynu neu ad-dalu tocynnau ar gyfer trafnidiaeth gyhoeddus
llogi cerbydau
prynu tanwydd ar gyfer cerbyd neu wefru cerbyd trydan
costau parcio
Mae hefyd yn cynnwys cost defnyddio neu logi unrhyw gerbyd neu fath o drafnidiaeth sy’n arddangos deunydd sy’n hyrwyddo canlyniad yr etholiad, gan gynnwys:
dylunio cynllun a’i osod ar y cerbyd neu’r math o drafnidiaeth
teithio rhwng ardaloedd etholiadol
teithio o amgylch ardal etholiadol
ffioedd parcio lle defnyddir cerbyd i arddangos deunydd
Mae costau adroddadwy yn cynnwys yr holl gostau trafnidiaeth sy’n gysylltiedig ag unrhyw weithgarwch arall a restrir. Er enghraifft, cludo rhywun i rali.