Dylech sefydlu cynllun hyfforddi yn gynnar yn eich cynlluniau ar gyfer yr etholiad sy’n nodi anghenion hyfforddi staff parhaol a staff dros dro o ran cyflawni eu rolau.
Mae angen i bob aelod o’r tîm, boed yn barhaol neu dros dro, ddeall ei rôl benodol ac unrhyw rwymedigaethau statudol sy’n gysylltiedig â’r gwaith mae’n ei wneud. Dylai’r holl staff dderbyn hyfforddiant ar y gofynion a’r cyfrifoldebau deddfwriaethol sy’n berthnasol i’w rôl, yn ogystal â hyfforddiant ar ddeall anghenion hygyrchedd gan sicrhau mynediad cyfartal a gofal cwsmer da.
Dylai eich cynllun hefyd gynnwys sut fyddwch yn gwerthuso’r sesiynau hyfforddi a’r deunyddiau a ddefnyddir er mwyn cyfrannu at gynllunio yn y dyfodol. Os oes gennych staff hyfforddi a datblygu yn eich awdurdod lleol, efallai y gallant eich helpu gyda'r broses hon.
Hyfforddiant diogelu data
Er y bydd yr hyfforddiant rydych chi’n ei gynnig i bob aelod o’r tîm wedi’i deilwra i’w rôl benodol, dylai bod pawb sy’n ymdrin â data personol yn ymwybodol o’r gofynion cyfreithiol ar gyfer trin data personol yn unol â deddfwriaeth diogelu data, a chael eu hyfforddi i wneud hynny.
Dylech drafod eich cynlluniau ar gyfer hyfforddiant diogelu data gyda Swyddog Diogelu Data eich cyngor. Bydd hyfforddiant diogelu data yn eich helpu i wreiddio egwyddorion diogelu data yn eich gwaith a dangos eich bod yn cydymffurfio â deddfwriaeth diogelu data.