Mae cofrestru dienw ar gael i etholwyr y byddai eu diogelwch mewn perygl pe byddai eu henw neu eu cyfeiriad yn cael eu rhestru ar y gofrestr etholiadol. Mae pobl eraill yn yr un cartref hefyd yn gymwys i gofrestru fel etholwyr dienw a gallant hefyd wneud cais am gofrestriad dienw pe ddymunant.1
Dylech ystyried pa sefydliadau neu eiddo, megis llochesau, a ddylai gael ffurflenni cofrestru dienw a gwybodaeth ychwanegol fel rhan o’ch dyletswydd i gynnal y gofrestr. Gallai ffurflenni cofrestru gael eu hanfon ynghyd â nodyn yn egluro beth yw cofrestru dienw a sut y gall pobl wneud cais.
Mewn partneriaeth â Cymorth i Fenywod, rydym wedi llunio canllawiau ar gofrestru dienw i weithwyr proffesiynol sy’n gweithio gyda goroeswyr cam-drin domestig.
Mae’r canllawiau, a all hefyd fod yn ddefnyddiol i chi a’ch staff, yn egluro beth yw cofrestru dienw a bydd enw a manylion cyfeiriad ymgeisydd yn cael eu cadw’n ddiogel ac ni fyddai modd chwilio amdanynt ar y gofrestr etholiadol. Mae’r canllawiau hefyd yn amlinellu sut i wneud cais am gofrestriad dienw.
Efallai y bydd amgylchiadau lle y gall etholwr posibl ymateb i gyfathrebiadau cofrestru megis cyfathrebiadau ynghylch y canfasiad, gwahoddiadau i gofrestru neu hysbysiadau cofrestru awtomatig gyda rheswm a all fodloni’r gofynion ar gyfer cofrestriad dienw. Bryd hynny, dylid anfon ffurflen cais am gofrestriad dienw. Mewn achos o gael yr ymateb yn sgil cyfathrebiad i’r cartref, dylid dweud wrth yr unigolyn, yn dibynnu ar yr amgylchiadau, y gall pobl eraill yn y cartref hefyd fod â’r hawl i gofrestru’n ddienw.
Cyfuno cofrestriad dienw â hawl etholwr categori arbennig arall
Nid yw cofrestru dienw yn effeithio ar unrhyw hawl etholwr categori arbennig arall a gellir eu cyfuno. Er enghraifft, gall unigolyn fod yn etholwr dienw â chysylltiad lleol neu’n bleidleisiwr dienw yn y lluoedd arfog, neu’n bleidleisiwr tramor dienw os yw’n bodloni’r cymhwyster ar gyfer y ddau gofrestriad.