Er mwyn newid y cyfeiriad lle mae wedi'i gofrestru, mae angen i etholwr wneud cais newydd i gofrestru.
Beth os bydd yr etholwr wedi symud o fewn fy ardal gofrestru?
Os cewch eich hysbysu'n uniongyrchol gan etholwr o newid cyfeiriad o fewn eich ardal gofrestru, dylech roi gwybodaeth iddo – ac i unrhyw etholwyr eraill sydd wedi symud gydag ef – am sut i wneud cais newydd i gofrestru. Dylech hefyd wneud ymholiadau i gadarnhau a oes preswylwyr newydd, neu a oes unrhyw breswylwyr blaenorol wedi symud allan.
Os cewch eich hysbysu ar gais i gofrestru bod yr ymgeisydd wedi rhoi'r gorau i fyw mewn cyfeiriad arall yn yr un ardal gofrestru, a bod y cais yn y cyfeiriad newydd yn llwyddiannus, dylech ddileu'r cofnod ar y gofrestr sy'n cynnwys ei gyfeiriad blaenorol. Rhaid i'r llythyr cadarnhau y mae'n ofynnol i chi ei anfon mewn ymateb i gais llwyddiannus i gofrestru, ym mhob achos lle rhoddwyd cyfeiriad blaenorol nad yw'r ymgeisydd yn byw ynddo mwyach, gadarnhau y caiff ei gofnod cofrestru mewn perthynas â'r cyfeiriad hwnnw ei ddileu.2
Beth os bydd yr etholwr wedi symud i ardal gofrestru arall?
Os bydd etholwr wedi gwneud cais i gofrestru mewn ardal arall, a'i fod wedi nodi nad yw'n byw mewn cyfeiriad yn eich ardal mwyach, byddwch yn cael hysbysiad gan Wasanaeth Digidol Cofrestru Etholiadol Unigol pan fydd y Swyddog Cofrestru Etholiadol newydd wedi caniatáu'r cais. Yna gallwch ddilyn y broses ddileu.
Pan fyddwch wedi nodi enw a chyfeiriad person nad yw wedi cofrestru a bod gennych reswm i gredu y gall fod yn gymwys, mae'r gofynion gwahoddiad i gofrestru yn gymwys.3