Cynnal cofrestru etholiadol - Cymru

Cynnal cywirdeb a chyflawnder y gofrestr drwy gydol y flwyddyn   

Mae pwyslais drwy gydol y flwyddyn ar gofrestru yn allweddol i sicrhau bod gennych hyder yng nghyflawnder a chywirdeb y gofrestr, ac yn gallu parhau i’w chynnal.  

Dylech adolygu eich cynlluniau cofrestru a’ch strategaeth ymgysylltu â’r cyhoedd bresennol yn dilyn y canfasiad blynyddol i gyfleu unrhyw gynlluniau ar gyfer y flwyddyn ganlynol, megis cynnal y prosesau cofrestru pleidleiswyr yn awtomatig, anfon ffurflenni ymholi ynghylch cofrestru, caffael diweddariadau data rheolaidd ar gyfer cyrhaeddwyr a chartrefi gofal ac unrhyw gynlluniau i gynnwys gweithgarwch lleol mewn digwyddiadau cenedlaethol megis Wythnos Genedlaethol Democratiaeth.

Mae rhagor o wybodaeth i’w chael yn ein canllawiau - Eich strategaeth ymgysylltu â’r cyhoedd a’ch cynllun cofrestru.

Eiddo Llwybr 2 a Llwybr 3 nad yw’n ymateb 

Bydd angen i chi benderfynu pa gamau, os unrhyw rai, y byddwch yn eu cymryd mewn perthynas ag eiddo nad yw wedi ymateb i gyfathrebiadau ynghylch y canfasiad lle’r oedd ymateb yn ofynnol ac mae camau ail-gysylltu ac atgoffa wedi cael eu cynnal.    

Rydych yn gallu ystyried diffyg ymateb i gyfathrebiadau ynghylch y canfasiad lle’r oedd ymateb yn ofynnol fel un darn o dystiolaeth ar gyfer y diben o adolygu hawl etholwr i barhau wedi cofrestru.

Dylech ystyried a fyddwch yn gwirio data lleol ymhellach i chwilio am ail ddarn o dystiolaeth nad yw etholwr yn breswylydd mwyach er mwyn eich galluogi i’w ddileu o’r gofrestr neu a fyddwch yn cynnal unrhyw adolygiadau o hawl etholwr i barhau wedi cofrestru.  

Dylech hefyd ystyried defnyddio’ch pwerau i gyrchu cofnodion lleol eraill ac i wneud cais am wybodaeth i nodi etholwyr newydd posibl yn yr eiddo hwn nad yw’n ymateb.

Ymholiadau heb eu cwblhau, tystiolaeth ddogfennol a phrosesau ardystio 

Dylech barhau i fynd ar drywydd unrhyw geisiadau agored am ardystiadau neu dystiolaeth ddogfennol sydd eu hangen i gwblhau’r broses geisio a dylech adolygu eich cynlluniau ar gyfer mynd ar drywydd diffyg ymatebion i wahoddiadau i gofrestru drwy gydol y flwyddyn.

Bydd angen i chi gadw trywydd archwilio i ddangos pa gamau rydych wedi’u cymryd.