Cynnal cofrestru etholiadol - Cymru

Cynnwys yr hysbysiadau o anghysondeb

Rydym wedi llunio tabl sy’n nodi’r wybodaeth ofynnol y mae’n rhaid ei chynnwys yn yr hysbysiadau o anghysondeb.

Math o anghysondeb	Cynnwys rhagnodedig yr hysbysiad
Cyfeiriad y bleidlais bost1	Hysbysu'r etholwr: bod y cyfeiriad pleidlais bost ar gyfer trefniant pleidlais bost etholiadau’r Senedd ac etholiadau Llywodraeth leol yn wahanol i’r un ar gyfer trefniant pleidlais bost etholiadau Senedd y DU ac etholiadau’r Comisiynydd Heddlu a Throseddu, ac mae'n rhaid i'r cyfeiriadau hynny fod yr un fath os na chaiff cais newydd i bleidleisio drwy’r post ei wneud ac os na chaiff penderfyniad ei wneud arno erbyn y diwrnod perthnasol, bydd ei drefniant pleidleisio post ar gyfer etholiadau’r Senedd ac etholiadau Llywodraeth leol yn dod i ben ar y diwrnod perthnasol.
Hepgor llofnod2	Hysbysu'r etholwr: mae trefniant hepgor llofnod ar waith ar gyfer un o’i drefniadau pleidleisio absennol yn unig ac mae’n rhaid iddo fod ar waith ar gyfer y ddau neu ar gyfer dim un ohonynt, ac mae'n rhaid gwneud cais newydd i bleidleisio drwy’r post neu drwy ddirprwy a phenderfynu arno erbyn y diwrnod perthnasol. os na chaiff cais newydd ei wneud a phenderfynu arno erbyn y diwrnod perthnasol, bydd ei drefniant pleidleisio absennol ar gyfer etholiadau’r Senedd ac etholiadau Llywodraeth leol yn dod i ben ar y diwrnod perthnasol.
Enw a/neu gyfeiriad y dirprwy3	Hysbysu'r etholwr: bod un neu ill dau o enw neu gyfeiriad y dirprwy mewn perthynas â phenodi ei ddirprwy ar gyfer etholiadau’r Senedd ac etholiadau Llywodraeth leol yn wahanol i enw a/neu gyfeiriad y dirprwy mewn perthynas â’i benodi fel dirprwy ar gyfer etholiadau Senedd y DU ac etholiadau’r Comisiynydd Heddlu a Throseddu, a bod rhaid i fanylion y dirprwy fod yr un fath ar gyfer yr holl etholiadau bod rhaid gwneud cais newydd i bleidleisio drwy ddirprwy ac mae’n rhaid i benderfyniad gael ei wneud arno erbyn y diwrnod perthnasol. os na chaiff cais newydd ei wneud a phenderfyniad ei wneud arno erbyn y diwrnod perthnasol, bydd ei drefniant pleidlais bost ar gyfer etholiadau’r Senedd ac etholiadau Llywodraeth leol yn dod i ben ar y diwrnod perthnasol.
Pleidlais drwy’r post etholiadau’r Senedd ac etholiadau Llywodraeth leol / pleidlais drwy ddirprwy ar gyfer etholiadau Senedd y DU ac etholiadau’r Comisiynydd Heddlu a Throseddu4 Neu Pleidlais drwy ddirprwy ar gyfer etholiadau’r Senedd ac etholiadau Llywodraeth leol / pleidlais bost ar gyfer etholiadau Senedd y DU ac etholiadau’r Comisiynydd Heddlu a Throseddu5	Hysbysu’r etholwr bod ganddo drefniant pleidlais bost ar gyfer etholiadau’r Senedd ac etholiadau Llywodraeth leol a threfniant pleidlais drwy ddirprwy ar gyfer etholiadau Senedd y DU ac etholiadau’r Comisiynydd Heddlu a Throseddu. Neu Hysbysu’r etholwr bod ganddo drefniant pleidlais drwy ddirprwy ar gyfer etholiadau’r Senedd ac etholiadau Llywodraeth leol a threfniant pleidlais bost ar gyfer etholiadau Senedd y DU ac etholiadau’r Comisiynydd Heddlu a Throseddu. Hysbysu’r etholwr bod rhaid i’w drefniadau pleidleisio absennol fod yr un fath ar gyfer yr holl etholiadau. Hysbysu’r etholwr os na chaiff cais newydd i bleidleisio drwy’r post neu drwy ddirprwy ei wneud i gael gwared ar yr anghysondeb erbyn y diwrnod perthnasol, bydd ei drefniant pleidlais bost ar gyfer etholiadau’r Senedd ac etholiadau Llywodraeth leol yn dod i ben ar y diwrnod perthnasol.

Yn ogystal â’r cynnwys rhagnodedig, bydd angen i chi ddarparu gwybodaeth glir ynghylch:

manylion yr anghysondeb
sut i ddiwygio unrhyw drefniant pleidleisio absennol sydd ar waith
y cymwysterau y mae’n ofynnol i unigolyn sy’n cael ei benodi’n ddirprwy eu bodloni (pan fo’n briodol), sy’n tynnu sylw at y gwahaniaethau rhwng gofynion etholiadau Senedd y DU ac etholiadau’r Comisiynydd Heddlu a Throseddu ac etholiadau’r Senedd ac etholiadau Llywodraeth leol, sy’n egluro bod rhaid i unigolyn a benodir ar gyfer y ddau fod yn gymwys ar gyfer y ddau. Am ragor o wybodaeth, edrychwch ar ein canllawiau ar y cymwysterau ar gyfer gweithredu fel dirprwy
pa drefniadau pleidleisio absennol a fyddai’n parhau ar waith os nad yw’n gwneud cais newydd

Dylech gynnwys ffurflen gais bapur ar gyfer pleidlais bost, ac amlen gyda’r cyfeiriad arni eisoes ac wedi’i rhagdalu er mwyn i’r ffurflen gais gael ei dychwelyd ynddi. Dylech hefyd gynnwys eich manylion cyswllt perthnasol, sef e-bost neu rif ffôn.

Dylech ystyried sut i reoli amgylchiadau o ran adegau y mae etholwr yn cael hysbysiad o anghysondeb ac yn sgil hynny yn penderfynu ei fod yn dymuno newid y wybodaeth yn ei drefniant etholiadau Senedd y DU ac etholiadau’r Comisiynydd Heddlu a Throseddu neu ddiweddaru ei drefniadau etholiadau’r Senedd ac etholiadau Llywodraeth leol a threfniadau etholiadau Senedd y DU ac etholiadau’r Comisiynydd Heddlu a Throseddu yn lle. Bydd hyn yn cynnwys cyfeirio at yr opsiynau ar gyfer cwblhau cais etholiadau newydd ar gyfer Senedd y DU a’r Comisiynydd Heddlu a Throseddu ynghyd â, neu’n lle diweddaru ei drefniant etholiadau ar gyfer y Senedd a’r Llywodraeth leol.

Rydym wedi llunio templedi o hysbysiadau o anghysondeb sydd ar gael yn adran pleidleisio absennol y dudalen adnoddau.

Anghysondebau o ran dyddiad geni

Yn ystod eich gwaith paratoi ar gyfer y broses gydgyfeirio, efallai y byddwch yn canfod cofnodion ar gyfer unigolyn lle y mae anghysondeb o ran dynodwr dyddiad geni yn bodoli rhwng cofnodion a allai effeithio ar eich gallu i gyfuno cofnodion pleidleisio absennol.

Mae eich dyletswydd i gynnal cofnodion sy’n gywir ac yn gyflawn yn golygu bod gennych y pŵer i gymryd camau i geisio datrys yr anghysondebau hyn. Gallai hyn fod drwy gysylltu â’r etholwyr neu archwilio unrhyw ddata lleol perthnasol.

Nid oes unrhyw broses ragnodedig ar gyfer ymdrin ag anghysondebau o ran dyddiad geni, ond dylech sicrhau eich bod yn cadarnhau’r data a gedwir gyda digon o amser i allu rhoi unrhyw newidiadau ar waith cyn y diwrnod perthnasol.

Nid oes gofyn i chi ysgrifennu at yr etholwr yn yr amgylchiadau hyn, ond os oes gennych rif ffôn neu gyfeiriad e-bost, gallech ddefnyddio un o’r rhain i ofyn am yr wybodaeth. Dylech sicrhau bod trywydd archwilio clir yn cael ei gadw, pa un bynnag ddull rydych yn ei ddewis.

Os nad ydych chi’n fodlon bod y wybodaeth a gedwir yn gywir ac nad ydych yn gallu cadarnhau’r dyddiad geni cywir, dylid canslo’r trefniadau pleidleisio absennol. Dylech yna hysbysu’r etholwr ac anfon gwybodaeth ynghylch sut i wneud cais arall.

Mae templed o lythyr ar gael ar gyfer rheoli anghysondebau o ran dyddiad geni yn ein templedi o hysbysiadau o anghysondeb sydd ar gael yn adran pleidleisio absennol ein tudalen adnoddau.

Diweddarwyd ddiwethaf: 29 Gorffennaf 2026