Gwrthwynebiadau sy'n dod i law ar ôl y cyfnod o bum diwrnod
Nid yw gwrthwynebiadau a wneir ar ôl y cyfnod o bum diwrnod yn gohirio'r cais i gofrestru.1
Os na allwch benderfynu ar wrthwynebiad i gais sydd wedi dod i law ar ôl y cyfnod o bum diwrnod mewn da bryd ar gyfer y diweddariad nesaf i'r gofrestr, bydd y cais yn parhau yn ôl yr arfer a gallwch benderfynu arno. Os byddwch yn cyhoeddi hysbysiad o newid ac yn ychwanegu ymgeisydd sy'n destun gwrthwynebiad, dylech symud y manylion o'r rhestr gwrthwynebiadau i geisiadau i'r rhestr gwrthwynebiadau i gofrestriad.2
Os gallwch benderfynu ar y gwrthwynebiad cyn y diweddariad nesaf i'r gofrestr a'ch bod yn penderfynu caniatáu'r gwrthwynebiad, yna ni ddylech ychwanegu'r ymgeisydd at eich cofrestriad.3
Os bydd gwrthwynebiad i gofnod sydd eisoes ar y gofrestr etholiadol yn dod i law, dylech gadw'r etholwr ar y gofrestr nes y byddwch yn penderfynu ar y gwrthwynebiad.
Os byddwch yn gwrthod gwrthwynebiad, yna dylech anfon hysbysiad o'ch penderfyniad a'ch rhesymau dros ei wrthod at y gwrthwynebydd er mwyn iddo gael cyfle i ofyn am wrandawiad.4
Rhaid i'r hysbysiad i'r gwrthwynebydd nodi'r rhesymau dros wrthod y gwrthwynebiad a'i hysbysu y byddwch yn gwrthod y gwrthwynebiad oni fydd yn eich hysbysu o fewn tri diwrnod gwaith ei fod am gael gwrandawiad.5
Yr unig adeg y bydd yn ofynnol i chi hysbysu etholwr sy'n destun gwrthwynebiad bod ei gais neu ei gofrestriad wedi cael ei wrthod yw pan gaiff gwrandawiad ei gynnal o ganlyniad i'r gwrthwynebiad.6