Cynnal cofrestru etholiadol - Cymru

Dylech ymgorffori’r broses cofrestru pleidleiswyr yn awtomatig i’ch strategaeth ymgysylltu â’r cyhoedd, gan ddefnyddio sianeli cyfryngau cymdeithasol y cyngor, gwefannau a chyfleoedd y wasg i amlygu’r broses a’i diben. Mae rhagor o wybodaeth ar gael yn ein canllawiau ar sianeli cyfathrebu i ymgysylltu â phreswylwyr a chodi ymwybyddiaeth drwy ddefnyddio hysbysebu a’r cyfryngau. 

Dylai fod gennych wybodaeth ar gael am y gallu i optio allan o’r broses cofrestru pleidleiswyr yn awtomatig, sy’n cynnwys y gallu i gofrestru i bleidleisio’n awtomatig a gofynion y broses honno. 

Byddwch o bosibl yn nodi ac anfon hysbysiad cofrestru at bobl ifanc 14 a 15 mlwydd oed. Dylech sicrhau bod gwybodaeth benodol ar gael i’r unigolion hyn a’u rhieni neu ofalwyr ynghylch y broses cofrestru pleidleiswyr yn awtomatig. Dylai’r wybodaeth hon gynnwys sut y cafodd eu data ei nodi a’i brosesu, a sut y caiff ei storio. 

Dylech hyfforddi staff a fydd yn ateb galwadau ar eich rhan i ymateb i ymholiadau neu gyfeirio galwyr at y lle cywir. Rydym wedi datblygu Adnodd Cwestiynau Cyffredin i’ch cefnogi. 

Grwpiau anodd eu cyrraedd

Gallwch ddefnyddio partneriaid mewnol ac allanol rydych wedi ymgysylltu â nhw’n flaenorol i’ch helpu i nodi etholwyr sydd heb gofrestru mewn grwpiau anodd eu cyrraedd lle’r ydych yn llai tebygol o allu cyrchu data lleol e.e. pobl sy’n profi digartrefedd, neu’r rhai sydd â rhwystrau iaith. Gall y partneriaethau hyn eich galluogi i gymryd y camau eraill sydd ar gael i chi i nodi pobl sydd heb gofrestru. Mae’r rhain yn cynnwys:1

• Anfon gohebiaeth bapur
• Anfon gohebiaeth electronig
• Gwneud ymweliadau personol, pan fo’r unigolyn dros 16
• Gwneud galwadau ffôn, pan fo’r unigolyn dros 16 ac mae gennych ei rif ffôn
   

Dylech werthuso pa bynnag ddulliau rydych yn eu defnyddio i ymgysylltu ag etholwyr posibl i sicrhau eich bod yn cyrraedd y cynulleidfaoedd cywir ac yn rhannu gwybodaeth yn effeithiol.