Cynnal cofrestru etholiadol - Cymru

Gallwch ddileu cofnod etholwr oddi ar y gofrestr heb adolygiad os byddwch:1  

• wedi cael tystysgrif marwolaeth mewn perthynas â'r etholwr 
• wedi cael eich hysbysu gan y cofrestrydd genedigaethau a marwolaethau bod etholwr wedi marw
• wedi cael gwybodaeth:
  • o ganlyniad i'r canfasiad (er enghraifft, gohebiaeth ganfasio sy'n cael ei dychwelyd gan nodi bod etholwr wedi marw)
  • o gofnodion y cyngor a'ch penododd
  • gan berson neu sefydliad sy'n darparu gwasanaethau i'r cyngor a'ch penododd 
  • gan berthynas agos (gŵr/gwraig, partner sifil, rhiant, tad-cu/mam-gu, brawd, chwaer, plentyn neu ŵyr/wyres i'r etholwr). 
  • gan reolwr cartref gofal cofrestredig.2  

Pan fydd y wybodaeth wedi'i darparu gan berthynas agos rhaid iddi gynnwys:

• enw llawn a chyfeiriad yr etholwr sydd wedi marw
• enw llawn a chyfeiriad y person sy'n darparu'r wybodaeth
• ei berthynas â'r sawl a fu farw
• datganiad bod y person sy'n darparu'r wybodaeth yn ymwybodol o'r gosb am ddarparu gwybodaeth anwir3  

Pan fydd y wybodaeth wedi'i darparu gan reolwr cartref gofal cofrestredig, rhaid iddi gynnwys:

• enw llawn a chyfeiriad yr etholwr sydd wedi marw;
• enw llawn a chyfeiriad y person sy'n darparu'r wybodaeth
• datganiad bod y person sy'n darparu'r wybodaeth yn ymwybodol o'r gosb am ddarparu gwybodaeth anwir4  

Gall perthynas agos neu reolwr cartref gofal ddarparu gwybodaeth yn ysgrifenedig, yn bersonol neu dros y ffôn. Pan gaiff gwybodaeth ei darparu'n bersonol neu dros y ffôn rhaid i chi gofnodi'r wybodaeth yn ysgrifenedig neu ar ffurf data.

Pan fyddwch yn dileu cofnod etholwr oddi ar y gofrestr am ei fod wedi marw, dylech gynnal trywydd archwilio o'r rhesymau dros eich gweithredoedd. Mewn perthynas â hysbysiadau gan y cofrestrydd genedigaethau a marwolaethau, dylech gadw mewn cof mai dim ond y cofrestrydd sy'n gyfrifol am yr ardal lle digwyddodd y farwolaeth y dylid ei hysbysu o'r farwolaeth, ac os bydd etholwr sydd wedi'i gofrestru yn eich ardal yn marw yn rhywle arall, nad yw'n debygol y byddwch yn cael hysbysiad ffurfiol.

Os cewch eich hysbysu bod person wedi marw mewn unrhyw amgylchiadau heblaw am y rhai a restrwyd, bydd angen i chi gael ail ffynhonnell o wybodaeth cyn y gallwch ddileu cofnod yr etholwr. Er enghraifft, gallech gysylltu â'r cofrestrydd i gael hysbysiad ffurfiol o'r farwolaeth, a fyddai'n eich galluogi i ddileu'r cofnod heb gael rhagor o wybodaeth nac adolygiad.

Ceir rhagor o wybodaeth yn eich canllawiau ar y cofnodion y gallwch eu harchwilio.