Cynnal cofrestru etholiadol - Cymru

Mae’n rhaid i chi ysgrifennu at ymgeiswyr i roi gwybod iddynt a yw eu cais wedi cael ei dderbyn1  neu ei wrthod.2  Os caiff cais ei wrthod, mae’n rhaid i chi nodi’r rheswm/rhesymau dros hynny.3  Mae yna broses apelio ar gyfer ceisiadau am bleidlais absennol nad ydynt wedi cael eu caniatáu.

Lle’r ydych yn cadarnhau trefniant pleidleisio drwy’r post ar gyfer etholiad penodol, cyfnod penodol neu’r cyfnod hiraf posibl, mae’n rhaid i’r hysbysiad hefyd nodi pa bryd y daw’r trefniant i ben.4

Lle na gaiff penderfyniad ei wneud ar gais o fewn cyfnod a fydd yn caniatáu’r etholwr i gael a dychwelyd ei bleidlais bost neu le na gaiff penderfyniad ei wneud arno tan ar ôl etholiad penodol, dylech roi gwybod i’r ymgeisydd na fydd y penderfyniad yn cael ei wneud mewn pryd iddo gael pleidlais bost ar gyfer yr etholiad penodol hwnnw, ond y bydd y bleidlais bost ar waith ar gyfer etholiadau’r dyfodol. 

Dylech geisio cysylltu ag etholwyr o’r fath drwy e-bost neu dros y ffôn i egluro’r trefniadau amgen y gellid eu rhoi ar waith ar gyfer y diwrnod pleidleisio.

Os nad yw’r dyddiad cau i bleidleisio drwy ddirprwy wedi mynd heibio, dylech dynnu sylw at yr opsiwn hwn ar gyfer yr etholiad penodol a chynnwys y ffurflen berthnasol. Fodd bynnag, dylech hefyd nodi pe bai’r etholwr yn dewis pleidleisio drwy ddirprwy ar gyfer yr etholiad penodol hwnnw, caiff y cais am bleidlais bost a broseswyd ar gyfer etholiadau’r dyfodol ei ganslo a bydd angen gwneud cais newydd am bleidlais bost. 

Mae llythyrau cadarnhau yn gyfle i ddiogelu rhag twyll neu gamddeall posibl, ar ran yr etholwr. Efallai y byddwch, yn ychwanegol, yn penderfynu cydnabod eich bod wedi cael ceisiadau. Os caiff etholwr neges gydnabod ar gyfer pleidlais bost nad yw wedi gofyn amdani, byddai cael y neges gydnabod yn rhoi cyfle iddo gysylltu â chi.

Dylai’r holl ymatebion, ynghyd ag unrhyw negeseuon cydnabod neu hysbysiadau cadarnhau a ddychwelwyd heb eu danfon/yr unigolyn ddim yn byw yn y cyfeiriad gael eu monitro ac, os oes gennych bryderon, dylech gysylltu â’ch Pwynt Cyswllt Unigol am gyngor. Mae rhagor o wybodaeth ar gael yn ein canllawiau ar adnabod ceisiadau amheus am bleidlais bost.