Cynnal cofrestru etholiadol - Cymru

Mae sawl ffordd y gall etholwyr wneud cais i bleidleisio drwy’r post:

• ar-lein ar GOV.UK
• ar ffurf ysgrifenedig (e.e., ar ffurflen gais bapur)
• wyneb yn wyneb yn eich swyddfa (os ydych yn penderfynu cynnig y gwasanaeth)

Ceisiadau ar-lein

Gall etholwyr wneud cais am bleidlais bost ar-lein drwy’r gwasanaeth gwneud cais am bleidlais bost, sydd ar gael ar GOV.UK.

Fodd bynnag, nid yw’n bosibl i ddirprwy enwebedig sy’n dymuno pleidleisio drwy’r post wneud cais am bleidlais bost ar-lein.

Ceisiadau papur

Nid yw ffurflenni pleidlais bost yn rhagnodedig. Fodd bynnag, mae’n rhaid i gais gynnwys yr holl wybodaeth ofynnol  ac mae’n rhaid i’r llofnod a’r dyddiad geni gael eu cyflwyno mewn fformat penodol.

Pan gewch gais am ffurflen gais bapur, cyn i chi ddarparu un, dylech wirio a yw’r ymgeisydd wedi cofrestru i bleidleisio neu wedi gwneud cais i gofrestru i bleidleisio. Os nad yw wedi gwneud hynny, dylech egluro bod angen i’r ymgeisydd gofrestru i bleidleisio a dylech gynnig y cyfle iddo wneud cais i gofrestru ar-lein neu anfon ffurflen cofrestru pleidleisiwr.  

Rydym yn creu ffurflenni ceisiadau am bleidlais bost argraffadwy y gallwch eu defnyddio.

Caiff y ffurflenni ceisiadau am bleidlais bost argraffadwy hyn eu cyhoeddi ar ein gwefan ac ar GOV.UK.

Gall cais am bleidlais bost ar bapur fod mewn unrhyw fformat: mae llythyr, e-bost gydag atodiad a sganiwyd neu ffurflen gais bapur yn dderbyniol, cyhyd â bod y llofnod a’r dyddiad geni yn glir ac wedi’u darparu ar y ffurf ragnodedig.

Os cewch gais ysgrifenedig nad yw ar ffurflen gais, dylech wirio a yw’n cynnwys yr holl wybodaeth ofynnol. Os nad yw’n gyflawn, dylech ddilyn y broses a amlinellir yn ein canllawiau ar geisiadau anghyflawn.

Ceisiadau wyneb yn wyneb

Gall pobl gael anawsterau wrth gwblhau cais am bleidlais bost. Er budd a chyfleustra eich etholwyr, ac i’ch cynorthwyo i fodloni eich dyletswyddau dan Ddeddf Cydraddoldeb 2010, dylech gynnig gwasanaethau ceisiadau wyneb yn wyneb i roi’r cyfle i unigolion wneud cais heb yr angen i ddarparu gwybodaeth sydd ei hangen mewn cais ar ffurf ysgrifenedig.

Os na allwch ddarparu cymorth wyneb yn wyneb i bawb er mwyn cwblhau ceisiadau ar gyfer pleidleisiau post, dylech ddarparu’r cymorth hwn o hyd yn ôl eich disgresiwn mewn rhai amgylchiadau.

Wrth ymdrin â cheisiadau wyneb yn wyneb, cyn bwrw ymlaen, dylech wirio a yw’r ymgeisydd wedi cofrestru i bleidleisio neu a yw wedi gwneud cais i gofrestru i bleidleisio. Os nad yw wedi gwneud hynny, dylech egluro bod angen i’r ymgeisydd gofrestru i bleidleisio cyn y gall gael pleidlais bost a dylech gynnig y cyfle iddo wneud cais i gofrestru. 

Dylech wirio a oes gan yr ymgeisydd yr holl wybodaeth ofynnol er mwyn i chi allu cwblhau cais yn llawn ar ei ran. Mae hyn yn cynnwys ei rif Yswiriant Gwladol, neu reswm pam na ellir ei ddarparu, ei ddyddiad geni, a’i allu i ddarparu llofnod ysgrifenedig mewn inc ar ffurflen bapur neu ffotograff o’i lofnod mewn inc i’w uwchlwytho i’r gwasanaeth gwneud cais am bleidlais bost ar-lein. Gallwch gynorthwyo’r ymgeisydd i dynnu llun o’i lofnod a’i uwchlwytho os oes angen.

Os na all person ddarparu llofnod ysgrifenedig, gall wneud cais am hepgoriad.

Ni all ceisiadau a wneir drwy’r gwasanaeth ymgeisio am bleidlais bost gael eu cwblhau’n rhannol a dychwelyd atynt yn ddiweddarach. Felly, os nad yw ymgeisydd yn gallu darparu’r holl wybodaeth, bydd angen i chi sicrhau bod ei gais yn cael ei gofnodi ar ffurflen bapur i ganiatáu i chi ychwanegu unrhyw wybodaeth goll yn ddiweddarach. 

Ar ôl i chi gael y wybodaeth ofynnol, dylech ei darllen i’r ymgeisydd i roi’r cyfle iddo adolygu’r wybodaeth a ddarparwyd ac i fod yn fodlon fod y wybodaeth yn wir ac yn gywir. 

Os ydych yn caniatáu ceisiadau wyneb yn wyneb, mae’n bwysig eich bod yn cadw cofnodion cywir o’r wybodaeth a ddarperir gan ymgeiswyr. Cyn casglu unrhyw wybodaeth, dylech wneud yr ymgeisydd yn ymwybodol o’ch hysbysiad preifatrwydd, rhoi gwybodaeth gyffredinol ynghylch sut y caiff ei ddata ei ddefnyddio a thynnu ei sylw at y drosedd o wneud datganiad ffug.