Cynnal cofrestru etholiadol - Cymru

Fel rhan o’r broses gwneud cais am bleidlais bost, gall unigolyn ofyn i’w papurau pleidleisio drwy’r post gael eu hanfon i gyfeiriad sy’n wahanol i’w gyfeiriad cymhwyso. Gall pleidleiswyr post presennol hefyd wneud cais am ailgyfeirio.

Mae’n rhaid i unrhyw gais ar gyfer ailgyfeirio papurau pleidleisio drwy’r post (oni bai ei fod yn etholwr sydd wedi cofrestru’n ddienw) nodi pam fod yr ymgeisydd angen i’w bapur pleidleisio gael ei anfon i’r cyfeiriad hwnnw.

Mae llawer o amgylchiadau a all arwain at unigolyn yn gwneud cais am ailgyfeirio pleidlais bost: gall fod ar ei wyliau, yn yr ysbyty, gydag ymrwymiadau o ran ei waith mewn man arall, ac ati. Os yw’r unigolyn wedi nodi ei fod yn dymuno i’w bleidlais bost gael ei hailgyfeirio ond nid yw wedi cynnwys unrhyw resymau, dylech ysgrifennu at yr etholwr a gofyn iddo roi eglurhad.

Ni all ddweud ‘mae’n well gennyf y trefniant hwnnw’. Nid yw hyn yn nodi ei amgylchiadau ac, felly, nid yw’n rheswm dilys. Pan fo hyn yn digwydd, dylech roi’r cais i un ochr a gofyn i’r etholwr am ragor o wybodaeth. Os nad yw’n ymateb i nodi ei amgylchiadau, gallwch wrthod y cais ar y sail nad yw’n bodloni’r gofynion rhagnodedig.

Lle bo’r amgylchiadau wedi cael eu hegluro, ni allwch wrthod cais am bleidlais bost na chais am ailgyfeirio ar y sail nad ydych yn fodlon a’r eglurhad a roddwyd. Os yw’r rheswm yn codi amheuon, neu mae gennych bryderon oherwydd amgylchiadau eraill sy’n cysylltu’r cais ailgyfeirio â phobl eraill yn yr ardal, neu â chyfeiriad penodol, dylid adrodd hyn i’ch Pwynt Cyswllt Unigol yn yr Heddlu Lleol.

Dylid monitro niferoedd yr ailgyfeiriadau pleidleisiau post. Mae’n bwysig bod yn effro i batrymau newydd o ran ailgyfeiriadau. Yn benodol, dylech gytuno gyda’ch pwynt cyswllt unigol yn yr heddlu ar drothwy ar gyfer nifer y ceisiadau a gyfeirir at un cyfeiriad ac ystyried ei hysbysu os cyrhaeddir y trothwy hwn.

Lle byddwch yn caniatáu unrhyw gais ailgyfeirio, mae’n rhaid i chi gadarnhau hyn i’r etholwr ar ffurf ysgrifenedig, a gallwch wneud hynny ar yr un pryd ag yr ydych yn cadarnhau p’un a oedd ei gais am bleidlais bost yn un llwyddiannus.  Mae’n rhaid i’r hysbysiad gael ei anfon at yr etholwr yn ei gyfeiriad cofrestredig ac nid y cyfeiriad y caiff y papur pleidleisio ei anfon ato.

Mae gwybodaeth ynghylch beth i’w wneud pan gewch gais ailgyfeirio ar gyfer pleidleisiwr post presennol ar gael yn ein canllawiau ar geisiadau ailgyfeirio ar gyfer pleidleiswyr post presennol.