Cynnal cofrestru etholiadol - Cymru

Ceisiadau ar-lein

Ni fydd ymgeisydd yn gallu cyflwyno cais anghyflawn am bleidlais bost ar-lein.

Dyma’r unig eithriadau:

• lle nad yw’r ymgeisydd yn gallu darparu ei Rif Yswiriant Gwladol ac mae’n darparu datganiad o’r rhesymau pam fel rhan o’r cais
• lle nad yw’r ymgeisydd yn gallu darparu ei lofnod ac mae’n nodi y bydd angen trefniant hepgor arno

Lle nad yw’r ymgeisydd yn gallu darparu ei Rif Yswiriant Gwladol, dylech geisio dilysu hunaniaeth yr ymgeisydd drwy ddefnyddio’r broses eithriadau.1

Ceisiadau papur

Efallai y cewch geisiadau papur am bleidlais bost nad ydynt yn cynnwys yr holl wybodaeth ofynnol.

Ni allwch benderfynu ar gais am bleidlais bost os yw unrhyw elfen o’r wybodaeth ofynnol ar goll neu’n anghyflawn.

Os nad yw’r ymgeisydd wedi gallu darparu ei Rif Yswiriant Gwladol, mae’n rhaid iddo ddarparu datganiad o’r rhesymau pam fel rhan o’r cais.

Lle nad yw ymgeisydd yn gallu darparu ei Rif Yswiriant Gwladol, ac mae’n darparu datganiad o’r rhesymau pam, ni chaiff y cais ei wrthod ar y sail ei fod yn anghyflawn a dylech ddilysu hunaniaeth yr ymgeisydd drwy ddefnyddio’r broses eithriadau.2

Os na cheir unrhyw eglurhad o ran pam fod y wybodaeth ofynnol ar goll o gais papur, dylech, lle bo modd, ymholi i gael y wybodaeth goll. Os na chaiff y wybodaeth goll ei chyflwyno, mae’n rhaid i chi wrthod y cais.  Dylech gysylltu â’r ymgeisydd, egluro pam fod y cais wedi cael ei wrthod ac egluro sut i wneud cais newydd. Os caiff y cais ei wneud yn y cyfnod cyn etholiad, dylech hefyd egluro y dylai cais newydd gael ei gyflwyno erbyn 5pm, 11 diwrnod gwaith cyn yr etholiad er mwyn iddo gael ei brosesu mewn pryd ar gyfer yr etholiad hwnnw.
 

Methu â darparu llofnod neu fethu â darparu llofnod cyson

Lle nad yw ymgeisydd yn gallu darparu ei lofnod, dylai nodi y bydd angen trefniant hepgor arno a dylech anfon ffurflen cais am drefniant hepgor llofnod i’w llenwi.