Cynnal cofrestru etholiadol - Cymru

Ceisiadau ar-lein

Ni fydd ymgeisydd yn gallu cyflwyno cais anghyflawn am bleidlais drwy ddirprwy ar-lein. 

Yr unig eithriadau yw:

• os na all ymgeisydd ddarparu ei rif Yswiriant Gwladol a'i fod yn rhoi datganiad yn nodi'r rhesymau pam fel rhan o'r cais
• os na all ymgeisydd ddarparu ei lofnod a'i fod yn nodi y bydd angen hepgoriad arno
• os na all ymgeisydd ddarparu ei rif Yswiriant Gwladol, rhaid i chi geisio cadarnhau pwy yw'r ymgeisydd drwy ddefnyddio'r broses eithriadau.1  

Ffurflenni cais papur

Efallai y byddwch yn cael ceisiadau papur am bleidleisiau drwy ddirprwy nad ydynt yn cynnwys yr holl wybodaeth ofynnol.

Ni allwch benderfynu ar gais am bleidlais drwy ddirprwy os oes unrhyw elfen o'r wybodaeth ofynnol ar goll neu'n anghyflawn.

Ceisiadau papur ar gyfer etholiadau Senedd Cymru neu etholiadau llywodraeth leol

Os bydd y cais ar gyfer etholiadau Senedd Cymru neu etholiadau llywodraeth leol a'i fod yn anghyflawn, dylech wneud ymholiadau er mwyn cael y wybodaeth sydd ar goll lle y bo'n bosibl. Os na chyflwynir yr wybodaeth sydd ar goll, rhaid gwrthod y cais.

Os bydd yn ymddangos bod yr etholwr wedi gwneud camgymeriad wrth gwblhau ei gais am bleidlais drwy ddirprwy (er enghraifft, os bydd wedi rhoi ei ddyddiad geni yn y drefn anghywir), dylech gysylltu â'r etholwr a gofyn iddo ailgyflwyno ffurflen gais.

Ceisiadau papur ar gyfer etholiadau Senedd y DU ac etholiadau Comisiynwyr yr Heddlu a Throseddu

Os bydd y cais ar gyfer etholiadau Senedd y DU neu etholiadau Comisiynwyr yr Heddlu a Throseddu ac nad yw'r ymgeisydd wedi gallu darparu ei rif Yswiriant Gwladol, rhaid iddo ddarparu datganiad o'r rhesymau pam fel rhan o'r cais.

Os na fydd ymgeisydd yn gallu darparu ei rif Yswiriant Gwladol, a'i fod yn rhoi datganiad yn nodi'r rhesymau pam, ni chaiff y cais ei wrthod am ei fod yn anghyflawn a rhaid i chi gadarnhau pwy yw'r ymgeisydd drwy ddefnyddio'r broses eithriadau.2  

Os na roddir unrhyw esboniad pam y mae'r wybodaeth ofynnol ar goll ar ffurflen gais bapur, dylech wneud ymholiadau er mwyn cael y wybodaeth sydd ar goll lle y bo'n bosibl. Os na chyflwynir y wybodaeth sydd ar goll, rhaid i chi wrthod y cais. Dylech gysylltu â'r ymgeisydd er mwyn esbonio pam mae'r cais wedi cael ei wrthod a sut i gyflwyno cais o'r newydd. Os gwneir y cais yn ystod y cyfnod cyn etholiad, dylech esbonio bod yn rhaid i gais newydd ddod i law erbyn 5pm, 6 diwrnod gwaith cyn yr etholiad, er mwyn iddo allu cael ei brosesu mewn pryd ar gyfer yr etholiad hwnnw. 

Os na fydd ymgeisydd yn gallu darparu ei lofnod, dylai nodi y bydd angen hepgoriad arno a dylech anfon cais am hepgoriad llofnod i'w gwblhau ato.